Almatyda «Qazaq kıno panoramasy 2008-2010» atty shyǵarmashylyq konferentsııa óz jumysyn bastady

dep habarlaıdy QazAqparat.

Konferentsııaǵa 20-daı kórkem jáne 10-nan asa derekti kınolentalar usynylǵan. Onyń ishinde tanymal «Qosh bol, Gúlsara!», «Stalınge syılyq», «Adasqandar», «Báıterek», «Seker» jáne taǵy da basqa kıno týyndylar bar. Búgin rejısser Sábıt Qurmanbekovtyń «Seker», Danııar Salamattyń «Báıterek» týyndysy jáne Aleksandr Golovınskııdiń «Chehovty oınaımyz» atty derekti fılminiń kórsetilimi bolyp ótti.

«Sońǵy 10 jylda mundaı forým ótken joq. Buryndary ár eki jyl saıyn ótip turatyn. Sondyqtan da, Qazaqstan kınematografıster odaǵy burynǵy dástúrdi qaıta jańǵyrtý maqsatynda búgingi is-sharany uıymdastyryp jatyr. Shyǵarmashylyq konferentsııany dástúrge aınaldyrýdy josparlap otyrmyz. Atalmysh shara, sońǵy jyldary, memlekettik jáne jeke menshik kınostýdııalarda túsirilgen kınofılmderdi saraptap, saralaýǵa, kıno salasynyń baǵyt-baǵdaryn aıqyndaýǵa múmkindik beredi», dedi belgili kınosynshy, Qazaqstan kınematografıster odaǵynyń múshesi, ónertaný ǵylymynyń kandıdaty Baýyrjan Nógerbek. Onyń aıtýynsha, mundaı konferentsııany jylda ótkizip turý kerek.

Kıno úıiniń úlken zalynda ótip jatqan fılm kórsetilimderine kirý tegin. Fılmder naýryz aıynyń 25-ine deıin, saǵat 10.00-den - 14.00-ge deıin kórsetiletin bolady.

Shara aıasynda Kıno úıinde, naýryzdyń 19-y kúni, saǵat 16.00-de Aleksandr Golovınskııdiń «Trıýmfatordyń tragedııasy» atty fılminiń premerasy bolady. Kınofılm Muhtar Áýezovtyń taǵdyry týraly, jazýshy Nıkolaı Anastasevtiń kitaby jelisi boıynsha túsirilgen.

Іs-shara nátıjelik «dóńgelek ústel» otyrysymen aıaqtalady.