Almatyda «Qazaq hanymy» halyqaralyq baıqaýynyń jeńimpazy anyqtaldy

Respýblıka saraıynyń sahnasynda «Qazaq hanymy» baıqaýynyń jartylaı fınalynan ótken 25 hanym baq synady. Olar Qazaqstannyń barlyq óńirleri men Qytaı, Qyrǵyzstan jáne Mońǵolııa elderinen keldi. Fınalǵa shyqqandar óz ónerlerin ortaǵa saldy. Atap aıtsaq, halyq ánderin naqyshyna keltirip oryndady, bı bıledi, mýzykalyq aspaptarda oınady, teatrlandyrylǵan kórinis qoıdy.

Úmitkerlerdiń barlyǵy baıqaýǵa tııanaqty daıyndalyp kelgen. Olar boıyndaǵy ónerlerin barynsha kórsetýge tyrysyp baqty. Sharany uıymdastyrýshylar qatysýshylarǵa shekteý qoımady. Bas júldege tigilgen 10 mıllıon teńge men táj úshin kúres shynaıy ári adal ótti.

Ádilqazylar alqasy 25 qatysýshynyń ishinen jeńimpazdy anyqtaý úshin 10 kelinshekti tańdady. Aldymen olardyń qazaqtyń salt-dástúrleri týraly bilimderin tekserip, sodan keıin júldegerler men jeńimpazdardyń atyn atady.

Sonymen, baıqaýdyń qorytyndysy boıynsha 31 jastaǵy úsh balanyń anasy taldyqorǵandyq Marjan Altybaeva táj ben aqshalaı syılyqtyń ıegeri atandy.

«Men áli de jeńimpaz ekenime sene almaı turmyn. Bul bir tús sııaqty. Shynymdy aıtsam, men muny kútpegen edim. Bul ońaı bolǵan joq men baıqaýǵa uzaq daıyndaldym. Óte qýanyshtymyn. Uıymdastyrýshylarǵa jáne maǵan qoldaý kórsetken adamdarǵa rahmet. Jarys jaqsy ótti. Bul meniń jeńisim ǵana emes, otbasymnyń jeńisi. Bul men úshin úlken jaýapkershilik, bul mártebeni abyroımen oryndaımyn. Men jeńip alǵan qomaqty somanyń bárin qaıyrymdylyqqa jumsaımyn. Az qamtylǵan otbasylarǵa taratyp beremin», - dedi jeńimpaz Marjan Altybaeva.

Birinshi oryndy Baıan Musaev enshilese, ekinshi oryn Janar Qadyrovaǵa, úshinshi oryn Gúlnar Jaıyqqa buıyrdy. Olar baıqaý demeýshileri daıyndaǵan aqshalaı jáne baǵaly syılyqtarymen marapattaldy. Janar Qadyrova arnaıy júldeni onlaın daýys berý arqyly jeńip aldy.

Qazylar alqasynyń quramynda Zeınep Ahmetova, Yrza Tursynzada, Seken Turysbekov, Klara Qabylǵazına, Alma Amanjolova, Darıǵa Turanqulova, Erjan Aıtqalı, Baqytbek Smaǵulov, Lázzat Súleımen syndy tanymal tulǵalar boldy.

Uıymdastyrýshylardyń aıtýynsha, bul saıystyń basty maqsaty - qazaqtyń hanymy atyna laıyq qazaq áıelin anyqtaý. Eliniń de, eriniń de abyroıy úshin baryn salyp júrgen qazaqtyń qarapaıym, kóp balaly áıelderin nasıhattaý úshin qolǵa alynǵan joba.

Jalpy baıqaýǵa qatysýǵa ártúrli jastaǵy 4 myńǵa jýyq áıel ótinish bergen. Іrikteý kezeńinen 25 hanym ótti.