Almatyda «Qazaq» gazetiniń 1915 jylǵy jınaǵy jaryq kórdi
ALMATY.QazAqparat - Almatyda Ǵylym ordasy kitaphanasynda «Qazaq» gazeti 1915 jyl» jınaǵynyń tusaýkeseri ótti, dep habarlaıdy QazAqparat tilshisi.
«Qazaq» gazetiniń 105 jyldyǵyna oraı ótkizilgen dóńgelek ústel otyrysyna tarıhshy, fılolog ǵalymdar qatysty. Jıynda Ahmet Baıtursynov negizin qalaǵan basylym jınaǵynyń halyq úshin ózektiligi aıtyldy.
«Qazaq» gazeti búgin de ózekti. Qazaq ólim aýzynda turǵanda esin jıǵyzyp, etek-jeńin jınaýǵa , óziniń adamı qasıetin túsinýge kómektesken basylym. Qazaq gazeti ulttyq ıdeıanyń, sananyń jetilýine tikeleı eńbek etetin basylym. Bunyń orny erekshe. Qazaq gazeti qazaqqa bolysýdyń , arasha túsýdiń úlgisi. Ahań salǵan gazet»,-dedi tanystyrylym barysynda tarıh ǵylymynyń doktory Mámbet Qoıgeldi.
Ǵylym ordasy kitaphanasy mamandary qolǵa alǵan eńbektiń jumysy 2 jylǵa sozylǵan. Kúndiz -túni kóz maıyn tamyzǵandardyń biri, tarıh ǵylymdarynyń doktory Svetlana Smaǵulovanyń aıtýynsha , bul gazet -jýrnalıstıkanyń eń bıik shoǵyry ispetti.
«Túpnusqany sırek qordan aldyq, onda joǵyn Qazan qalasy, Sankt-Peterbýrg, Orynbor men Máskeýdiń ǵylymı kitaphanalaryna baryp taýyp aldyq. 265 sany tabyldy. Ahmet Baıtursynovtyń eńbeginde jazylǵan jádetshe dep atalatyn, qazaq tilindegi arab qarpimen jazylǵan gazet. Keıbir sózderin 2-3 kún oqyǵan kezderimiz boldy. Bul basylymdy jýrnalıstıkanyń eń bıik shoǵyry dep aıtar edim. Munda gýmanıtarlyq, jaratylystaný salasy qamtylǵan. Basylym óz kezeńinde Qytaı, Túrkııa, Reseıge tarap otyrǵan. Taralymy 3-myńnan 8 myńǵa deıin jetken», - dedi Svetlana Smaǵýlova.
«Qazaq» gazetiniń 1915 jylǵy jınaǵy ázirge 60 danamen shyǵyp otyr. Svetlana Smaǵýlovanyń aıtýynsha, qoldaǵy baryn kitaphanalarǵa taratyp, keıinnen tıraj sanyn kóbeıtip satylymǵa qoıý josparda bar. Basylymnyń 1916-18 jyldar aralyǵyndaǵy sandaryn aýdarý jumystary bastalyp ketti.
Araılym Joldasbaı
