Almatyda qazaq ǵaryshtyq zertteýleriniń negizin qalaýshy ǵalymǵa arnalǵan dárishana ashyldy
ALMATY. 21 qazan. QazAqparat /Názıra Eleýhan/ - Ál-Farabı atyndaǵy QazUÝ-dyń mehanıka-matematıka fakýltetinde matematık, Qazaq KSR Ǵylym akademııasynyń akademıgi, fızıka-matematıka ǵylymdarynyń doktory, qazaqstandaǵy sáýlelenýdiń tasymaldaý teorııasy ǵylymı mektebiniń negizin salýshy Ómirzaq Sultanǵazın atyndaǵy dárishana ashyldy.
Qazaq ǵaryshtyq zertteýleriniń negizin qalaýshy ǵalym atyna arnalǵan oqý aýdıtorııasynyń ashylýyna QR Parlamenti Májilisiniń depýtaty Kenjeǵalı Saǵadıev, Ál-Farabı atyndaǵy QazUÝ rektory Ǵalym Mutanov, «Memlekettik tilge qurmet» birlestiginiń tóraıymy Asyly Osman jáne ǵalymnyń jary Raıhan Ǵaınıqyzy, mehanıka-matematıka fakýltetiniń dekany, professor Ýálıhan Ábdibekov, sonymen qatar matematık ǵalymdar men fakýltettiń oqytýshy-professorlar quramy men stýdentteri qatysty.
Sharanyń ashylýynda sońynan óshpes mura qaldyrǵan, matematıka ǵylymynyń damýyna zor eńbek sińirgen ǵalymnyń qaıratkerligi men ǵylym jolyndaǵy estelikteri aıtyldy.
"Birtýar ǵalym, akademık Ómirzaq Sultanǵazın kózi tiri bolsa, 75 jasyn toılar edi. Alaıda ǵalymnyń aty da, haty da ólgen joq. Aıtýly ǵalym týystarynyń arasynda, ǵylymda jáne qoǵamda máńgi umytylmas ereksheligimen nasıhattala beredi. Matematıktiń ǵylymǵa sińirgen óshpes murasyn dáriptep, aıtyp, jalǵastyryp otyrý úshin osy aýdıtorııany sol kisige arnap otyrmyz", - dedi akademık oqý ornynyń rektory.
Aýdıtorııanyń ashylý saltanatynan keıin, Ómirzaq Sultanǵazınniń 75 jyldyǵy qarsańyna oraı, «Ónegeli ómir» serııasymen jaryq kórgen serııaly kitaptyń tusaýkeser rásimi boldy.
Ǵylymǵa ólsheýsiz úles qosqan ǵalymdardy nasıhattaýǵa arnalyp, ýnıversıtet baspasynan arnaıy serııamen jaryq kórip otyrǵan altynshy kitapta Ómirzaq Mahmutulynyń ómiri, ǵylym joly, eńbekteri, akademık jaıyndaǵy zamandastarynyń estelikteri jazylǵan.
«Rýhanı qazynamyzdy boıymyzǵa jınap, ony jas urpaqtarǵa jetkizýde múndaı ıgi isterdiń orny erekshe. Ómirzaq Sultanǵazın Qanysh Sátbaev sııaqty erekshe qubylys. Ol qazaq ǵylymyn álemdik deńgeıde tanytqan ǵalym. Sheteldik ǵalymdar ony álem sańlaǵy dep moıyndaǵan. Álemdik deńgeıde matematıka salasynda dáris oqyǵan. Japonııada ony úlken ǵylymı ister bastamasy dep atasa, Frantsııa eli máńgi izdenister dep teńegen. Búginde biz ǵaryshtyq jetistikter arqyly aýa raıyn boljaý sııaqty múmkindikterge jetip otyrmyz. Al onyń bárin damytyp, búginge jetkizgen árıne, qoldanbaly matematıka ǵylymynyń negizin salǵan, Ǵarysh ınstıtýtyn ashqan - Ómirzaq Sultanǵazın», - dep atap ótildi shara barysynda.
