Almatyda qazaq blogshylary bas qosty
ALMATY. 24 naýryz. QazAqparat /Názıra Eleýhan/ - Ulystyń uly kúni qarsańynda Almatyda qazaq blogshylarynyń І quryltaıy ótti.
Tuńǵysh ret ótkizilgen sharaǵa Qazaqstan, Qytaı, Mońǵolııa, Germanııa, Frantsııadan 150-den astam blogshy jınaldy. Sharany «Nur Otan» HDP hatshysy Erlan Qarın ashyp, «Qazaqstanda áleýmettik jeliler damýynyń jalpy sıpattamasy» taqyrybynda baıandama jasady. Sonymen qatar QR Parlamenti Májilisiniń depýtattary Bekbolat Tileýhan, Murat Ábenov qatysyp, óz oılaryn ortaǵa saldy.
Quryltaı barysynda «Internettegi avtorlyq quqyq», «Blog arqyly tabys tabý», «Saıttardy damytý» taqyryptarynda tanystyrylymdar jasalyp, belgili mýltımedıa mamany Dın Kokstyń sheberlik synyby ótkizildi. Quryltaı aıasynda tuńǵysh ret blogshylar baıqaýy ótkizilip jeńimpazdar marapattaldy. Sondaı-aq start-ap jobasy aıasynda 3 jobaǵa 100 myń teńgeden júlde berildi. Uıymdastyrýshylardyń aıtýynsha, shara kelesi jyly da jalǵasyn tabatyn bolady.
«Bıylǵy quryltaıdyń basty maqsaty - blogshylardyń bir-birimen tanysyp, óz oılaryn ortaǵa salyp, jobalaryn tanystyrýy, sondaı-aq úzdik blogshylardy anyqtap, olarǵa dem berý bolatyn. Quryltaı óz maqsatyna jetti. 150-ge jýyq blogshy qatysyp, óz jobalaryn tanystyrdy, ózekti máselelerdi talqylady. Arnaıy mamannyń sheberlik sabaǵyn tyńdady. Sonymen qatar bıylǵy jyldyń eń úzdik blogtaryn anyqtap marapattadyq. 3 jobaǵa 100 myń teńgeden syıaqy berildi. Jalpy quryltaı tek qana jańa medıany emes, sonymen qatar qazaq ınternetin damytýǵa az da bolsa úles qosty dep oılaımyn», - deıdi quryltaıdy uıymdastyrýshylardyń biri «MediaLab» medıa-kommýnıkatsııa ortalyǵynyń atqarýshy dırektory Erbol Azanbek.
Esterińizge sala keteıik, qazaq blogshylarynyń tuńǵysh basqosýy naýryzdyń 19 kúni Almatyda bastalǵan bolatyn. Sharany QMEBI, Kcell, «Qazaqtelekom», Nokia, HP, Mega Ice kompanııalarynyń qoldaýymen «Minber», «MediaLab», «MediaNet», «As klýb» jýrnalıstik uıymdary uıymdastyrǵan.
