Almatyda qazaq áıelderi arasynan shyqqan tuńǵysh geolog-ǵalym Patshaıym Tájibaevanyń 90 jyldyq mereıtoıy atalyp ótti
Y. Qańtardyń 10-y. QazAqparat /Názıra Eleýhan/ - Búgin Almatyda Ulttyq ǵylym akademııasynyń Q.Sátbaev atyndaǵy geologııa ınstıtýtynyń májilis zalynda ǵalym, memleket jáne qoǵam qaıratkeri Patshaıym Tájibaevanyń týǵanyna 90 jyl tolýyna arnalǵan keńeıtilgen ǵylymı keńes jıyny ótti,
dep habarlaıdy QazAqparat.
Jıynǵa elimizdiń qoǵam qaıratkerleri, ǵalymnyń áriptesteri men shákirtteri qatysty. Olar mereıtoı ıesi týraly oı-pikirlerin, onyń ǵylymǵa qosqan úlesi men jetistikterin, qoǵamdyq qyzmetterdegi atqarǵan isteri jaıynda eske alyp, syr shertti. Mereıtoılyq saltanatty kesh basynda Patshaıym Tájibaeva týraly derekti fılm kórsetildi.
«Patshaıym Tájibaeva - álem moıyndaǵan ǵalym, geologııa ǵylymy salasyndaǵy tuńǵysh ǵalym qazaq qyzy. Onyń ǵylym salasyna qosqan úlesi mol. Ol geologııanyń lıtologııa salasynyń negizin qalap, damytqan. Qumkólde munaı qory bar ekendigin boljaǵan. Elimizdegi jańa ken oryndaryn ashty. Onyń qoǵamdyq qyzmeti de san-salaly, ári aýqymdy boldy. Uly ustazy Qanysh Sátbaevti máńgilik este qaldyrý maqsatynda qyrýar is tyndyryp uly esimdi qaıta jańǵyrtyp, qala, kóshe atyn berýge úles qosqan bolatyn. Ol syrttaı susty kóringenmen, shyn máninde júregi jylylyqqa toly, asa meıirimdi, qarapaıym jan edi», dep eske aldy kúıeý balasy, QR eńbek sińirgen qaıratkeri, Reseı Pedagogıka jáne áleýmettik ǵylymdar akademııasynyń akademıgi, professor, belgili qazaq jazýshysy Sábıt Dosanov.
Patshaıym Tájibaevanyń shákirti, geologııa-mıneralogııa ǵylymynyń doktory, ınstıtýttyń bas ǵylymı qyzmetkeri Nádir Ázerbaevtyń aıtýynsha, Qazaqstanda ǵylymnyń lıtologııa salasynyń qalyptasýy men damýy Patshaıym Tájibaevanyń atymen tikeleı baılanysty. «Onyń eńbekteriniń arqasynda lıtologııa salasy halyqaralyq deńgeıde tanyldy. Ol lıtologııa salasymen qosa, mıneralogııa, krıstallohımııa, paleografııa salalaryn da zerttedi. Onyń qazaq ǵylymynyń damýyna qosqan úlesin jaryq kórgen 150-den astam ǵylymı jumystarynan, shyǵarǵan tórt monografııasynan kórýge bolady. Onyń bastamalaryn biz jalǵastyrýdamyz. Ol qaıratty, eńbekqor adam, kóp qyrly ǵalym retinde bizdiń esimizde qaldy», dedi Nádir Ázerbaev.
Patshaıym Tájibaeva Qazaqstan Joǵarǵy keńesiniń depýtaty, Joǵarǵy keńes tóraǵasynyń orynbasary laýazymdaryn atqarǵan. Amerıka, Japonııa, Germanııa, Vengrııa sııaqty elderdiń ǵylymı qaýymdastyǵynyń múshesi. Ol Halyqtar dostyǵy jáne Eńbek Qyzyl Tý ordenimen marapattalǵan.
