Almatyda Qazaq arýlaryn ulyqtaý sharalary ótip jatyr
ALMATY. 21 qyrkúıek. QazAqparat /Erlik Erjanuly/ - Búgin Almatyda "Qazaqtyń asyl arýlary" degen atpen "D. Qonaev áriptesteriniń jubaılaryn eske alý" klýbynyń dóńgelek ústel jıyny ótti. Ol Táýelsizdiktiń 20 jyldyǵyna jáne Dinmuhamed Qonaevtyń 100 jyldyq mereıtoıyna arnaldy.
"Bul sharanyń basty maqsaty - D.Ahmetulynyń ónegeli isteri men qyzmetterine qatysty qyzmettes áriptesteriniń jubaılarynyń estelikterin jazyp alý. Jınalǵan málimetterdi talqylap, olardy nasıhattaý. Munda Dinmuhamed Qonaevtyń qyzmettes áriptesteriniń jáne olardyń jubaılary týraly "Arýlar asyl jandar" dep atalatyn fotokórme ashyldy. Oǵan sırek kezdesetin jáne buryn-sońdy esh jerde kórsetilmegen 20-ǵa jýyq túrli-tústi fotosýretter qoıylyp otyr", - deıdi D.A. Qonaev murajaı-úıiniń Bas qor saqtaýshysy Gúlmıra Bekmuratova.
Onyń aıtýynsha, alqaly bul basqosý kezinde Keńes Aýhadıevtiń jubaıy Kerbez Ábilǵazyqyzyna arnalǵan "Kerbez" dep atalatyn estelik kitabynyń tusaýkeseri jasaldy. Oǵan belgili qoǵam qaıratkerleri men aqyn-jazýshylardyń estelikteri, arnaý sózderi toptastyrylǵan. Onda sondaı-aq, tuńǵysh ret "Kerbez ekeýmiz" dep atalatyn derekti fılm de kórermen nazaryna usynyldy.
