Almatyda qazaq ádebıetiniń ózekti máseleleri saralanýda - ǵylymı konferentsııa
ALMATY. 6 jeltoqsan. QazAqparat - Búgin Almatydaǵy «Áýezov úıi» ǵylymı-mádenı ortalyǵynda «Qazaq ádebıetiniń ózekti máseleleri» dep atalatyn respýblıkalyq ǵylymı-teorııalyq konferentsııa ótip jatyr.
M.Áýezov atyndaǵy ádebıet jáne óner ınstıtýty uıymdastyrǵan bul shara memleket jáne qoǵam qaıratkeri, partızan jazýshy, ádebıettanýshy-ǵalym, fılologııa ǵylymdarynyń doktory Ádı Sháripovtiń 100 jyldyǵyna arnalǵan.
Á.Sháripuly 1912 jyldyń 19 jeltoqsanda Semeı oblysy Jarma aýdanyndaǵy Marınovka aýylynda dúnıege kelip, 1993 jyly 4 qarashada Almatyda kóz jumǵan bolatyn. Ol 1938 jyly qazirgi Abaı atyndaǵy qazaq pedagogıkalyq ýnıversıtetin bitirgen soń 1940 jylǵa deıin Qaskeleń qalasyndaǵy qazaq orta mektebinde ustazdyq etti, 1940-1941 jyldary Belorýssııada qyzyl ásker qatarynda boldy. Uly Otan soǵysynyń alǵashqy kúninen bastap 7-tank dıvızııasynyń quramynda nemis-fashıst basqynshylaryna qarsy soǵysqa qatynasqan Ádı Sháripuly 1941 jyldyń shilde aıynyń aıaq kezinde fashıst basqynshylarynyń qorshaýynda qalyp, jaý tylynda Belorýssııanyń Mýhın ormanynda partızan otrıadtaryn uıymdastyryp, otrıad komandıri jáne 2-Kletnıa partızan brıgadasy komıssarynyń orynbasary boldy. Al 1944-58 jyldary Qazaq KSR Oqý mınıstriniń orynbasary, 1958-63 jyldary Oqý mınıstri, 1963-66 jyldary Qazaq KSR Mınıstrler Keńesi tóraǵasynyń orynbasary jáne Syrtqy ister mınıstri, 1966-71 jyldary Qazaqstan Jazýshylar odaǵy basqarmasynyń birinshi hatshysy jáne KSRO Jazýshylar odaǵynyń hatshysy boldy. Sonymen qatar 1971-79 jyldary Qazaqstan ǵylym akademııasynyń Ádebıet jáne óner ınstıtýtynda aǵa ǵylymı qyzmetker, 1979-93 jyldary ınstıtýt dırektory qyzmetterin atqaryp, Qazaq KSR Joǵarǵy Keńesiniń 5-6, KSRO Joǵarǵy Keńesiniń 7-shi saılaýynyń depýtaty jáne KSRR Joǵarǵy Keńesi tóraǵasynyń orynbasary bolyp saılandy. Eren eńbegi úshin Lenın, 1-dárejeli Otan soǵysy jáne 2 ret Eńbek Qyzyl Tý, Qyzyl Juldyz, «Qurmet belgisi» ordenderimen marapattalǵan. Shyǵarmashylyq qyzmette «Partızan qyzy», «Dos syry», «Áke qabyry basynda», «Bir tonnyń tarıhy», «Sahara qyzy», «Shıpager» sııaqty kóptegen romandar men povester jáne áńgimeler jazdy.
