Almatyda qaıyrymdylyq týraly alǵashqy derekti fılmniń tanystyrylymy ótti
Y. Shildeniń 28-i. QazAqparat /Názıra Eleýhan/ - Búgin Almatyda Mega oıyn-saýyq kınoteatrynda tuńǵysh ret "Balalarǵa ómir syıla!" dep atalatyn qaıyrymdylyq týraly túsirilgen derekti fılmniń tusaýy kesildi.
Derekti fılmniń rejısseri - Igor Gonopolskıı, avtory - Janna Balaqaeva. Atalmysh shyǵarma "Meıirimdilik" (Úı) «Eriktiler qoǵamy" qoǵamdyq qorynyń "Balalarǵa ómir syıla!" dep atalatyn aktsııasy aıasynda túsirilgen. Bul shara 2007 jyly aqpan aıynda bastalǵan bolatyn.
"Fılm qaıyrymdylyq degen túsinikke jaýap beredi. Qaıyrymdylyq qorlar qalaı jumys isteıdi? Qarajattar qaıda baryp jatyr? Qaıyrym kórsetý qalaı tartylady? Olar jalpy kimderge kómektesýde, sol balalarǵa kómektiń qajet ekendigine qalaı senýge bolady? Kómek berilgennen keıin ne boldy? Ol balalar qalaı ómir súrýde jáne onyń ata-analary kómek bergen adamdarǵa ne aıtqysy keledi?... degendeı. Mine osy suraqtardyń bárine búgingi fılm jaýap bere alady. Bul bizdiń jumysymyzdyń esebi ispettes", deıdi "Úı" qaıyrymdylyq qorynyń dırektory Arýjan Saın.
Ol sonymen qatar, "bizdiń qaıyrymdylyq qor myńdaǵan adamdardyń jáne ondaǵan kompanııalardyń kómegimen úmitsiz qalǵan jandarǵa naǵyz ǵajaptyń bolatynyn sendirip, 2007 jyldyń aqpan aıynan 2010 jyldyń shilde aıyna deıin 241 balaǵa jańa ómir syıladyq. Olardyń kópshiligine "ómir súrýge esh úmit joq" degen dıagnoz qoıylǵan bolatyn. Olardy emdeýge 1 mıllıon 340 myń 624 AQSh dollary jınaldy", dep atap ótti.
Tanystyrylym barysynda sonymen qatar, tanymal sýretshi Janarbek Amanqulovtyń "Rahmet, Siz maǵan ómir syıladyńyz" dep atalatyn kúntizbeniń tusaýy kesildi. Onda túrli operatsııalardan keıin saýyǵyp ketken, deni saý balalardyń sýretteri engizilgen.
Sharaǵa fılmniń basty keıipkerleri bolǵan balalar jáne olardyń ata-analary, eriktiler, qoǵam qaıratkerleri, BAQ ókilderi, kómek kórsetken dárigerler men kompanııalar qatysty.
