Almatyda qaıyrymdylyq merekesinde óner kórsetken erekshe balalar marapattaldy
ALMATY. QazAqparat – Almatyda qaıyrymdylyq merekesinde óner kórsetken erekshe balalar marapattaldy, dep habarlaıdy QazAqparat tilshisi.
Bıyl «Qyzyl alma - myqty jáne baqytty otbasynyń sımvoly» atty qaıyrymdylyq festıvali onlaın formatta ótti. Oǵan Qazaqstannyń barlyq aımaǵynan 43 bala qatysyp, óz ónerlerin pash etti. Festıval osymen toǵyzynshy ret uıymdastyrylyp otyr.
Іs-sharanyń basty ıdeıalyq uıymdastyrýshysy Elmıra Alıevanyń aıtýynsha, festıval bekerden-beker «Qyzyl alma» atalmaǵan.
«Almanyń erekshe dámi balaǵa óte jaqsy tanys. Qyzyl aport Almatymen tyǵyz baılanysty. Jergilikti turǵyndar syılyq retinde jemistiń osy túrin syılaıdy. Biz Almaty almasynyń dámin, túsin jáne qunarlylyǵyn – ómir men damýdyń bastalýymen baılanystyrdyq. Osyndaı erekshe qasıetter, dástúrler men qundylyqtar jıyntyǵyn qaıda usynýǵa bolady? Árıne, syılastyq, súıispenshilik, qýanysh, qoldaý men qamqorlyq bıleıtin otbasynda. Kez kelgen otbasy hosh ıisti aport almasyn jaqsy kóredi, olar úıdegi jaılylyqty, otbasylyq jylýlyq pen súıispenshilikti beıneleıdi «, - dedi ol.
Eki kúnge sozylǵan festıval erekshe balalar men toptardyń shyǵarmashylyǵyn biriktirip, naǵyz merekege aınaldy.
16 jastaǵy almatylyq Ámire festıvalde «Qudaı týraly» óleńin oqydy. Ákesiniń aıtýynsha, Ámire óte qabiletti bala. Ol shahmat, mentaldy arıfmetıka boıynsha halyqaralyq jarystarda birneshe márte jeńimpaz atanǵan.
«Alla otbasyna bala beredi jáne olar ártúrli bolady. Dárigerler bizdiń Ámirdiń dıagnozyn aıtqanda qatty qorqyp kettik. Bul synaq. Sondyqtan biz bar ómirimizdi balamyzǵa arnaımyz dep sheshtik. Ol 16 jasta. Ata-anasy retinde onyń jetistikterine qýanamyz. Ámire – tolyqqandy tulǵa. Ol da eline paıda ákeletin adam. Ata-analar eshqashan úmit úzbeıdi, balalaryna qamqor bolady, eń bastysy jaqsy kóredi. Mundaı erekshe balalar mahabbatty óte názik sezinedi. Kez kelgen adam myqty tulǵa tárbıeleı alady, tek óz balańa jáne mahabbatyńa sený kerek», - dep bólisti Kenjebaı Isaev.
Festıvaldiń barlyq qatysýshylary Qurmet gramotalarymen jáne baǵaly syılyqtarmen marapattaldy. Ár qatysýshyǵa festıvaldyń sımvoly - qyzyl alma usynyldy.
Aıta keteıik, múmkindigi shekteýli adamdar COVID-19 juqtyrý qaýpine kiretin osal top bolǵandyqtan olar onlaın rejıminde marapattaldy.
