Almatyda qaıyrymdylyq kórme-satylymǵa mektep oqýshylarynyń 35 kartınasy qoıyldy (FOTO)

ALMATY. QazAqparat - Búgin Almatyda «Mega Alma-Ata-2» saýda oıyn-saýyq ortalyǵynda qaıyrymdylyq kórme-satylym ashyldy. Oǵan «Nursultan Nazarbaevtyń bilim qory» Qoǵamdyq qorynyń fılıaldary - «Mıras» bala baqshasy, Almaty halyqaralyq mektebi, «Mıras» halyqaralyq mektebi jáne «Arystan» mamandandyrylǵan lıtseıi oqýshylarynyń eńbekteri - barlyǵy 35 kartına qoıyldy.

«Oqýshylar bizdiń bastamamyzǵa qyzý qoldaý kórsetip, óz kartınalaryn tegin usyndy. Olardy satýdan túsken aqsha «Aıala» qorynyń «Art-Terapııa» jobasyn júzege asyrýǵa jumsalady. ıAǵnı, Qaraǵandy oblysynyń Saran qalasynda ornalasqan, múmkindigi shekteýli balalarǵa arnalǵan №5-shi oblystyq mektep-ınternattyń beıneleý óneri stýdııasyn jabdyqtaýǵa jumsalady», - dedi «Aıala» qaıyrymdylyq qorynyń vıtse-prezıdenti Jangeldi Sársenov.

Uıymdastyrýshylardyń aıtýynsha, eger búgingi qoıylǵan jumystar jaqsy satylatyn bolsa, onda oqýshylar basqa da kartınalaryn usynýǵa daıyn.

Aıta ketelik, kórmege 2-shi synyptan bastap, 11-shi synyp aralyǵyndaǵy oqýshylardyń kartınalary qoıylǵan. Jyl saıyn ótkizilip turatyn bul kórmeniń jumysy 15 mamyrǵa deıin sozylady.