Almatyda qaıyrymdylyq qorlar Balalar kardıohırýrgııasyna qajetti medıtsınalyq qural-jabdyqtardy tabystady
ALMATY. Sáýirdiń 26-sy. QazAqparat /Názıra Eleýhan/ - Búgin Almatyda QR Birinshi Prezıdent qory, «Aıala» jáne «Dara» qaıyrymdylyq qorlary A.N.Syzǵanov atyndaǵy Ulttyq ǵylymı hırýrgııa ortalyǵynyń kardıohırýrgııa bólimine 1,5 mıllıon teńge qarajat kóleminde júrek aýrýyna qajetti medıtsınalyq qural-jabdyqtardy kómek retinde tabystady,
dep habarlaıdy QazAqparat.
Bul zattar - az salmaqtaǵy náresteler úshin operatsııaǵa jasaýǵa qajetti qural-jabdyqtar.
«Biz úshin bul úlken kómek. Bizdi qaıyrymdylyq kómekterdiń bir-aq ret kórsetilmeıtindigi jáne qural-jabdyqtardyń kórmede turmaı, qajetine jarap jatqandyǵy qýantady. Qorlar buǵan deıin de kóptegen kómekter kórsetti. Mysalǵa, ótken jyly bizdiń dárigerler Italııa eliniń Bergamo atty eń iri klınıkasynda júrek aýrýyna jasalatyn eń qıyn operatsııa jasaý túri boıynsha jarty jyl boıy tájirıbe jınaqtap keldi. Sonyń arqasynda, qyzmetimiz arta túsip, biz jyldyń basynan beri 30 nárestege operatsııa jasadyq, oǵan deıin bir-eki ǵana operatsııa jasalynatyn. Biz qazir 5 keliden tómen salmaqtaǵy balalarǵa operatsııa jasaımyz, buǵan deıin tek 10 keli salamaqtaǵy balaǵa jasalynatyn. Men sondyqtan alǵysymdy aıtamyn», dedi A.N.Syzǵanov atyndaǵy Ulttyq ǵylymı hırýrgııa ortalyǵynyń kardıohırýrgııa bóliminiń meńgerýshisi, professor Arystan Seıdáli. Onyń aıtýynsha ótken jyly ortalyqtyń kardıohırýrgııa bóliminde 3 jastan tómengi balalarǵa 80 operatsııa jasalynǵan, onyń 27-si omyraý emetin nárestelerge jasalynǵan.
«Aıala» qaıyrymdylyq qory Prezıdentiniń Keńesshisi Jangeldi Sársenovtyń aıtýynsha jaqyn arada 30 mıllıon teńge kólemindegi iri joba iske asady. «Bizdiń qor qyzmetiniń negizgi baǵyty - balalar emhanasyna kómek kórsetý. Sondyqtan, biz elimizdiń eń kishkentaı azamattaryna kómek kórsetýdi qolǵa alyp, jarty jyldan astam ýaqyttan beri balalar kardıohırýrgııa máselesimen aınalysyp kelemiz. Ókinishke oraı, búgingi kúni Qazaqstandaǵy Balalar kardıohırýrgııasy óte aıanyshty jaǵdaıda. Búginde jylyna júrek ustamasy aýrýymen (parok serdtse) dúnıege keletin 3 000 balanyń, 2 paıyzyna ǵana operatsııa jasalynady, 80 paıyzy 1 jasqa jetpeı dúnıeden ótip jatyr. Múmkindigi barlar ǵana shet eldiń medıtsınalyq kómegine júginýde. Al, jaǵdaılary joq ata-analardyń balalary, ókinishke oraı, dúnıeden ótip jatyr. Biz sııaqty azamattyq qoǵam bar, olar kómek kórsetýde, «qatyp, turyp qalǵan seńdi qozǵaýda», biraq, bul úlken elimiz úshin az shara. Bul másele Úkimet deńgeıinde sheshilý kerek. Sonda ǵana bul másele sheshimin tabady», dedi Jangeldi Sársenov.
Ol sonymen qatar, «bizdiń dárigerlermen armanymyz - osy ortalyqta jeke Balalar kardıohırýrgııa bólimin ashý. Sonda bizdiń dárigerler odan da kóbirek operatsııa jasaı alady. Búgingi kúni omyraýdaǵy nárestelerge operatsııa úlkenderge jasaıtyn jerde jasalynady. Bizdiń endigi maqsatymyz - qarajat jınap tolyqqandy Balalar kardıohırýrgııa qyzmetin jasaý jáne qurý. Sonymen qatar, biz qazir osy syndy ortalyqtardyń perzenthanalarmen tyǵyz qarym-qatynas ornatýyn qarastyryp jatyrmyz. Óıtkeni, ustamaly júrek aýrýymen dúnıege kelgen balaǵa dál sol ýaqytynda kómek kórsetpese, 1-2 kúnnen keıin ol bala ólip qalý múmkindigine dýshar bolady», dep atap ótti ol.
