Almatyda qaıyrymdylyq kontserti ótti

Y. Jeltoqsannyń 2-si. QazAqparat /Ádilet Musahaev/ - Keshe Almatyda «Ulaǵatty januıa» qoǵamdyq qory qazaqstandyq ánshilermen birlesip «Bóten bala bolmaıdy»  uranymen qaıyrymdylyq kontsertin ótkizip, eki myńǵa jýyq AQSh dollaryn jınady,

dep habarlaıdy QazAqparat.

Atalmysh qordyń basshysy, prodıýsser ári «All Davaı» tobynyń ánshisi Shýhrat Muratuly óziniń áriptesterin kómekke zárý balalarǵa járdemdesý arqyly azamattyq boryshtaryn óteýge shaqyrýda.

«Bul shara arqyly elimizdiń jastary halyq aldynda ózderiniń jaýapkershiligin túsinetindigin dáleldegimiz keldi. Bizdiń shyǵarmashylyǵymyz otandastarymyzǵa tek kóterińki kóńil kúı syılamaı, olardyń patrıottyq sezimderin odan ári nyǵaıta túsýi kerek. Atqaryp otyrǵan bul isimizde erekshe eshteńe joq, tek kómekke zárý jandarǵa kómekteskimiz keledi», deıdi Shýhrat. Sondaı-aq ol qordyń jas ekenin jáne kishkentaı qadamdar arqyly úlken ister jasaýǵa bolatyndyǵyn jetkizdi.

Kontsertten túsken qarajat múgedek balalarǵa beriledi. Sonyń biri jastaıynan múgedek bolǵan 15 jasar Sultan Tumanov. Oǵan fınolkıtonýrııa dıagnozy qoıylǵan. Osy qaıyrymdylyq keshinde túsken qarajat onyń Qytaı emhanalaryna baryp emdelýine jumsalmaq.

Shara barysynda da kontsertke jınalǵan qaýym, shamalary kelgeninshe arnaıy qoıylǵan qorapqa aqsha salyp, qarjylaı kómek kórsetip jatty.

Keshte halyqaralyq konkýrstardyń laýreaty, ánshi ári aktrısa Larısa Korotıchenko jáne taǵy basqa tanymal ánshiler óner kórsetti.