Almatyda qaıyr suraıtyndarǵa qarsy reıd júrgiziledi
ALMATY. QazAqparat - Almatyda qaıyr suraýmen aınalysatyn adamdardy anyqtaý úshin reıd júrgizilýde, dep habarlaıdy QazAqparat tilshisi qalalyq polıtsııa departamentiniń baspasóz qyzmetine silteme jasap.
Baspasóz qyzmetiniń habarlaýynsha, qaıyr-sadaqa suraıtyndar qoǵamdyq oryndardaǵylardyń mazasyn alady. Osy máseleniń alyn alý úshin «Qaıyrshy» jedel-profılaktıkalyq sharasy ótkizilýde.
«Arnaıy reıd júrgizetin top quryldy. Onyń quramynda polıtsııa, prokýratýra, jumyspen qamtý ortalyǵy men ákimdik ókilderi bar. Ótken bir táýlik ishinde qaıyrshylyqpen aınalysqan 63 adamdy anyqtadyq. Onyń ishinde 7 kámeletke tolmaǵan bala bar. QR Ákimshilik quqyq buzýshylyq týraly kodeksiniń 449-baby boıynsha 13 adam ákimshilik jaýapkershilikke tartyldy. Polıtsııa basqarmasyna jetkizilgen adamdarǵa mamandar túsindirý jumystaryn júrgizdi. Sondaı-aq, olardy turaqty jumyspen qamtamasyz etý úshin aýdandyq jáne oblystyq jumyspen qamtý ortalyqtaryna aqparattar joldandy», - dedi Almaty qalalyq Jergilikti polıtsııa basqarmasynyń basshysy Tórehan Isın.
