Almatyda qaıtys bolǵan qyzdyń anasy Prezıdentten kómek surady
ALMATY. QazAqparat - 2022 jyldyń 4 mamyrynda Almatyda 16 jastaǵy Adel Aqanova qaıtys boldy. Qalalyq polıtsııa departamentiniń málimetinshe, ol ózi turatyn úıdiń aýlasynda asylyp qalǵan kúıi tabylǵan. Óz-ózine qol jumsaý faktisi boıynsha qylmystyq is bir jyldan astam ýaqyt tergelip, qylmys quramynyń bolmaýyna baılanysty jabylǵan. Alaıda marqumnyń anasy Aınagúl Beıisova tergeýshilerdiń nusqasymen kelispeıdi, qyzy kisi qolynan qaza tapqanyn aıtady. QazAqparat tilshisi oqıǵanyń mán-jaıymen tanysty.
Qyzynan aıyrlyǵan ana Prezıdentten kómek surady
Іs toqtatylǵannan keıin Aınagúl Beıisova qyzynyń ólimine kinálilerdi taýyp, jazalaýǵa kómektesý týraly ótinishpen prezıdentke ashyq túrde júginýdi uıǵardy. Ol isti tolyq ári obektıvti tergeý úshin Іshki ister mınıstrligine berýdi talap etýde.
Áıel óziniń beıneúndeýinde osy ýaqytqa deıin júrgizilgen barlyq saraptamalar munyń kisi óltirý ekenin kórsetip otyrǵanyn alǵa tartty.
«Denesindegi jaraqattar sýıtsıd jasaǵanyn joqqa shyǵarady. Onyń ústine sot-medıtsınalyq saraptamada denesindegi jaraqattar ushy úshkir doǵal zattyń áserinen bolǵanyn kórsetti. Basynan alǵan jaraqaty, qyzymnyń óz aıaǵymen tura almaǵanyn dáleldeıdi. Sondaı-aq, ol qarańǵy jerde, eki metrden asatyn qorshaýǵa óz betimen shyǵyp, eshqandaı tireýsiz aǵashqa asylyp qalýy múmkin emes. Onyń ústine qyzyma dárigerler mıopııa dıgnozyn qoıǵan, ıaǵnı eki kózide -2,5. Kózi nashar kóretin qyzymnyń ózine osylaı qol jumsaýy múmkin emes. Osy tusy zerttelmegen, óıtkeni fızıkalyq turǵydan áljýaz jáne dene shynyqtyrýdan bosatylǵan», - deıdi ol vıdeoda.
Sonymen qatar, ol Qaraǵandyda júrgizilgen bıologııalyq saraptamada qyzynyń kıiminen qan izderi tabylǵanyn aıtty. Alaıda bul teriske shyǵarýǵa bolmaıtyn faktiler tergeýde eskerilmegen.
«Qyzymdy eki adam óltirdi degen kýágerlerdiń sózi men aıǵaqtary esepke alynbady. Olardyń aıtýynsha, qyzymdy uryp, keıin asyp ketken. Onyń ústine saýsaq izin teksergende alaqanda da, tyrnaq astynan da, qyzymnyń kıiminen de arqannyń talshyqtary tabylǵan joq», - deıdi Adeldiń anasy.
Aınagúl Beıisova tártip saqshylarynyń áreketsizdigine shaǵymdandy. Onyń aıtýynsha, polıtseıler aýla turǵyndarynan jaýap almaǵan, kórshi keńselerdegi kameralardan beınejazbany talap etpegen, úı-úıdi aralamaǵan.
«Tergeýshiler kórshim bergen jaýapty eskermedi. Kórshim kishkentaı qyzdyń aıqaılaǵan daýysyn jáne ol shamamen 3-5 sekýndqa sozylǵanyn, keıin «joooq» degen daýys estilip, temir zatqa soǵylǵan bir dybysty estigenin aıtqan edi», - dep eske alady áıel.
Onyń aıtýynsha, Adel qatygezdikti bilmeıtin jarqyn jáne pozıtıvti bala bolǵan.
«Adeldiń ómirge degen úlken josparlary boldy. Meniń qyzym ıadrolyq fızık bolǵysy keldi, onyń bolashaǵy jarqyn bolýy múmkin edi, óıtkeni Adel sırek kezdesetin aqyldy jáne erekshe meıirimdi adam. Men Adel týraly ótken shaqta oılaýdy jáne aıtýdy úırenbedim, men úshin Adel menimen birge. Meniń basty mindetim – isti QR Qylmystyq kodeksiniń 99-baby (kisi óltirý) boıynsha ádil túrde ózgertip, jan túrshigerlik zulymdyq jasaǵan qylmyskerlerdiń jazalanýyn qamtamasyz etý», – deıdi Aınagúl Beıisova.
Prezıdentke joldaǵan úndeýinde ol isti qaıta qaraýdy jáne tergeýdi Іshki ister mınıstrliginiń bilikti qyzmetkerleriniń qolyna berýdi suraıdy.
Almaty polıtsııa departamenti bul oqıǵaǵa qatysty bylaı dep jaýap berdi.
«Bul oqıǵaǵa qatysty Almaty polıtsııa departamenti Qylmystyq kodekstiń 105-baby (Ózin-ózi óltirýge ıtermeleý) boıynsha tergeý júrgizdi. Tergeý organy kámeletke tolmaǵan adamdy óltirý faktisi boıynsha óziniń obektıvti rastalýyn tappaı, sot-medıtsınalyq saraptamanyń qorytyndylarymen jáne kýálardan jaýap alýmen teriske shyǵarylǵan barlyq dálelderdi tekserdi»,- dep atap ótti vedomstvodan.
2023 jyldyń 1 shildesinde qylmystyq quqyq buzýshylyq quramynyń bolmaýyna baılanysty qylmystyq is toqtatyldy, qaýlyny Almaty qalasynyń prokýratýrasy bekitti.
