Almatyda qaıtys bolǵan áıel 4 adamǵa donor boldy
ALMATY. QazAqparat – Almatyda qaıtys bolǵan 53 jastaǵy áıel tórt adamǵa donor boldy. Kardıologııa jáne ishki aýrýlar ǵylymı-zertteý ınstıtýtynda jas jigitke júrek transplantatsııasy jasaldy, dep habarlaıdy QazAqparat tilshisi.
Dárigerlerdiń aıtýynsha, Almatynyń 53 jastaǵy turǵyny tórt adamnyń ómirin aman alyp qaldy.
Ol ekinshi ret mıdyń ólimine ákep soqtyrǵan ıshemııalyq ınsýltqa shaldyqqan.
Donor Almatydaǵy № 4 aýrýhanada qaıtys bolǵan. Aǵzany alý sharalary atalǵan medıtsınalyq mekemede jasaldy.
«13 shilde kúni týystary marqumnyń aǵzasyn alýǵa kelisim berdi. Onyń júregi 23 jastaǵy jas jigittiń ómiri saqtap qaldy. Oǵan buǵan deıin eki ret ota jasalǵan. 2013 jyly júrek jetkiliksizdigi dıagnozy qoıyldy. Sodan beri onyń jaǵdaıy nasharlaı tústi. Jalǵyz jol- júrek aýystyrý boldy. Endi operatsııadan soń patsıenttiń sapaly jáne uzaq ómir súrýine múmkindigi bar», - deıdi kardıohırýrgııa bólimshesiniń meńgerýshisi Rústem Tóleýtaev.
Kardıologııa jáne ishki aýrýlar ǴZI Basqarma tóraǵasy Marat Pashımovtyń aıtýynsha, kúrdeli operatsııa 6 saǵatqa sozyldy.
Ota Ulttyq ǵylymı kardıohırýrgııalyq ortalyqpen birlesip, elimizdiń jetekshi kardıohırýrgy ıÝrıı Pıanyń tikeleı basshylyǵymen jasaldy.
«Almatyda júrekti alǵashqy almastyrý Ulttyq ǵylymı kardıohırýrgııalyq ortalyq mamandarynyń qoldaýy men Kardıologııa jáne ishki aýrýlar ǴZI komandasynyń úılesimdi jumysynyń arqasynda múmkin boldy», - dedi ol.
Qazaq ulttyq medıtsına ýnıversıtetine rektory Marat Shoranovtyń sózinshe, qaıtys bolǵan áıeldiń júreginen basqa eki búıregi jáne baýyry da alynyp, kezekte turǵan naýqastarǵa transplantatsııa jasalǵan.
«Qazir elimizde tórt myńǵa jýyq adam aǵza aýystyrý kezeginde tur. Onyń ishinde 147 naýqas júrek transplantatsııasy boıynsha tizimge qoıylǵan»,-dedi Marat Shoranov.
