Almatyda qaıta qalpyna keltirilgen «Aqqý» burqaǵyna aqqýlar jiberildi (FOTO)
Qyzyqty sharaǵa qoǵamdyq birlestik músheleri, qalalyq máslıhattyń depýtattary, Almaty qalasy ákimdiginiń ókilderi jáne qarapaıym qala turǵyndary qatysty.
«Bul almatylyqtar úshin erekshe oryn. Biz bul jerdi bala kezimizden jaqsy biletinbiz. Bul burqaqta kezinde shynynda da aqqqýlar júzgen. Bizdiń maqsatymyz - sol bir kóńilge qýanysh syılaıtyn jaıma-shýaq kórinisti qaıta qalpyna keltirý. Sol úshin qubyrlar júrgizilip, sýburqaq qalpyna keltirildi», - dedi Almaty qalalyq máslıhatynyń depýtaty Konstantın Avershın.
Zoobaq qyzmetkerleriniń aıtýynsha, qustar laıyqty dárejede baǵyp-kútiletin bolady. Kúnine bir ret dándi jemdermen qorektendiriledi. Kúzde fontan óshirilgen soń, aqqýlar qaıtadan zoobaqqa alynady.
Aıta ketelik, bul mańda kezinde almatylyqtardyń súıikti oryndarynyń biri - ataqty «Aqqý» dámhanasy bolǵan.
Uıymdastyrýshylardyń aıtýynsha, bul jer aldaǵy ýaqytta Almatynyń eń kórikti jerleriniń birine aınalmaq.
Búgingi shara Almaty qalasy ákimdigi men Almaty zoobaǵynyń bastamasymen uıymdastyryldy. 
