Almatyda «Qaırat Mustafın-80» fotokórmesi ashyldy
ASTANA. 14 sáýir. QazAqparat - Almatyda Jazýshylar odaǵy úıinde belgili fotojýrnalıst Qaırat Mustafındi eske alýǵa arnalǵan «Qaırat Mustafın-80» fotokórmesi ashyldy.
«Egemen Qazaqstan» gazetiniń jazýynsha, Jazýshylar odaǵy, Almaty jáne Qaraǵandy oblysy ákimdikteriniń qoldaýymen «Fotoóner» qoǵamdyq birlestigi uıymdastyrǵan kórmege avtordyń jarty ǵasyr boıy túsirgen eńbekteriniń eń tańdaýlylary qoıylǵan.
Qaırat Mustafın - qazaqtyń klassık jazýshysy Ǵabıden Mustafınniń uly. Azamattyq avıatsııanyń ushqyshtar mektebin támamdap, bort radısi mamandyǵyn alǵanmen, fotojýrnalıstıka salasyna birjola bet burady. Ol uzaq jyldar boıy respýblıkalyq basylymdarda, onyń ishinde «Qazaq ádebıeti» gazetinde jáne Qazaq telegraf agenttiginde qyzmet etken.
Q. Mustafın jarty ǵasyrǵa ulasqan kásibı jáne shyǵarmashylyq jolynda talaı-talaı belgili tulǵalardy, Qazaqstannyń sulý tabıǵatyn sýretke túsirip qana qoıǵan joq, sonymen birge ol Qazaqstan týraly ártúrli fotoalbomdar men kitaptardy bezendirýge de óz úlesin qosty. Búkilodaqtyq jáne halyqaralyq fotokórmelerdiń júldegeri jáne dıplomanty atanyp, zeınetke shyqqanǵa deıin «Óner» baspasynda qyzmet atqardy.
Kórmeniń maqsaty - qoǵamdy qazaqstandyq fotojýrnalıstıkanyń negizin qalaýshylardyń biri bolyp tabylatyn Qaırat Mustafınniń shyǵarmashylyq murasymen tanystyrý, - dedi «Ftoóner» qoǵamdyq birlestiginiń prezıdenti Asylhan Ábdiraıym. - Óıtkeni, ol kisi elimizdiń shejiresin qalyptastyrýǵa asa úlken úles qosqan azamat.
