Almatyda qaı kóshelerge bir baǵyttaǵy qozǵalys engiziledi
ALMATY.QazAqparat - Almatynyń ortalyq kóshelerinde jol qozǵalysynyń jańa syzbasy jasaldy. Bul týraly qala ákimdigi baspasóz qyzmetinen málimdedi, dep habarlaıdy QazAqparat tilshisi.
Jambyl men Bógenbaı batyr kóshesi bir baǵytty etip ózgertildi. 5 tamyzǵa deıin bul tizimge Maqataev, Gogol, Sháripova, Qabanbaı batyr, Qarasaı batyr kósheleri qosylady.
Bul ózgeris qalany keptelisten qutqaryp, jol-kólik oqıǵalaryn azaıtady. Sondaı-aq jaıaý jaıaý júrginshiler qaýipsizdigin qamtamasyz etedi.
«Almaty tájirıbesinde bir baǵyttaǵy qozǵalysty engizý burynnan qoldanylyp keledi. Biraz jyldan beri Naýryzbaı batyr men Jeltoqsan kóshesinde kólikter bir baǵytta júredi. Qurmanǵazy kóshesinde baǵyt ózgertilgennen keıin kólik apaty azaıdy. «Jańa» Shevchenko kóshesinde jol kólik oqıǵasy 4 esege azaıdy. Sonymen qatar bul jerlerde qozǵalys jyldamdyǵy 6-8 shaqyrymǵa joǵarylaǵandyǵy baıqalady»,-dedi qala ákimdigi baspasóz qyzmetinen.
Bul jańalyq qoǵamdyq kólik jolaýshylarynyń paıdasyna de sheshilmek. Belgilengen jolaqtarǵa baılanysty avtobýstar qozǵalysy jeńildep, almatylyqtar qalaǵan jerine jyldam jete alatyn bolady.
Sondaı-aq avtokólik ıelerin jańashyldyqtar kútip tur. Endi bir baǵyttaǵy kóshelerde jyldamdyq saǵatyna 40 shaqyrymdy quraıtyn bolady.
«Bir baǵytty joldardy engizý eksperımenti óz jemisin bere bastady. Qozǵalys jaqsardy. Dat sáýletshisi ıAn Geıl qalamyzǵa kelgende ortalyqtyń avtokólikter tranzıtine aınalmaýyn suraǵan edik. Ekologııalyq monıtorıngke sáıkes dál osy aýmaqta kóliktiń kóptiginen shań men kir jınalǵan. Bir baǵytty joldyń arqasynda bul máseleler sheshilip keledi. Muny quptamaıtyndar shyǵys aınalma avtojolyna shyǵýyna bolady»,-dedi Almaty qalasy sáýlet jáne qala qurylysy basqarmasy bastyǵynyń orynbasary Almashan Ahmetjanov.
Qala ákimdiginiń aıtýynsha, mundaı ózgerister halyqaralyq tájirıbege súıenip jasalýda.
