Almatyda qaýipti qylmyskerdiń artynan 13-qabattan sekirgen polıtseı marapattaldy
ALMATY. QazAqparat - Almatyda 13-qabattyń terezesinen sekirgen qylmyskerdi ustaǵan polıtsııa qyzmetkeri marapattaldy, dep habarlaıdy QazAqparat tilshisi.
«Búgin áriptesimiz Baqytjan Bákirovti Іshki ister mınıstri Erlan Turǵymbaev «Quqyq tártibin qamtamasyz etýde qosqan úlesi úshin» medalimen marapattady. Biz onyń úıine baryp, hal-jaǵdaıyn bilip, tezirek saýyǵyp ketýin tiledik. Qyzmetke berilgen osyndaı janqııarlyqty úlgi ete otyryp biz polıtsııadaǵy jas qyzmetkerlerge tárbıe beremiz jáne azamattardyń tynyshtyǵy men qaýipsizdigin saqtaýda naǵyz kásibı áreket qalaı jasalatynyn naqty mysal retinde kórsetemiz. Maıor Bákirovke rızashylyǵymdy bildiremin. Osyndaı uldy tárbıelep ósirgen ata-anasyna erekshe alǵys aıtamyn», – dedi Almaty qalalyq Polıtsııa departamentiniń bastyǵy Qanat Taımerdenov.
Sonymen qatar, mınıstr jáne PD basshysy Túrksib aýdandyq PB janyndaǵy polıtsııa bóliminiń taǵy jeti qyzmetkerin marapattady, olardyń arqasynda balany qorlaǵan asa qaýipti qylmysker laıyqty jazasyn alady.
Esterińizge sala keteıik, qylmys 11 shildede Túrksib aýdanynda jeke úıler alabynda bolǵan. Túste kúdikti Pokrovskaıa kóshesinde ornalasqan úılerdiń birine kiltti tańdaý aqyly kirgen. Úıde 2 bala - tórt jastaǵy ul bala men onyń 15 jastaǵy ápkesi bolǵan. Qaskóı pyshaqpen qorqytyp, 17 myń dollardy ıemdenip, sodan keıin qyzdy qorlaǵan.
Keıin Ál-Farabı dańǵylyndaǵy úıde jasyrynǵan kúdikti polıtsııadan qashyp turǵyn úıdiń joǵarǵy qabatynan sekirip ketken. Sol kezde maıor Baqytjan Bákirov onyń artynan birge sekirip, qylmyskerdi qýyp jetken.
