Almatyda «Qaýipsiz qala» baǵdarlamasy aıasynda eki myńnan asa beınebaqylaý ornatylady - Almaty qalasy ІІD
ALMATY. 25 qańtar. QazAqparat /Názıra Eleýhan/ - Almatyda «Qaýipsiz qala» baǵdarlamasy aıasynda eki myńnan asa beınebaqylaý ornatylady,
dep habarlaıdy Almaty qalasy ІІD-niń baspasóz qyzmeti.
«Polıtsııanyń tehnıkalyq kómekshisi» qoǵamdyq oryndarda, mektepterde jáne iri megapolıstiń joǵary oqý oryndary men jol qıylystaryna ornatylmaq. Polıtseılerdiń aıtýyna qaraǵanda, jańa qondyrǵy kóshe tártibin baqylap qana qoımaı, qylmystyń aldyn alyp, onymen tikeleı kúreste de óz tıimdiligin arttyrmaq.
«Búgingi kúni «Qaýipsiz qala» baǵdarlamasyn iske asyrý áli de qyzý jalǵasýda. Jańa oqý jyly basynan 16 mektepte 1 464 beınekamera ornatyldy. Kolledjder men joǵary oqý oryndarynda 700 kamera jumys istep tur. Qazirgi ýaqytta qalanyń 107 kóshe qıylystaryna 400 beınekamera ornatý qolǵa alynýda. Olar kóshe boıyndaǵy qozǵalǵan avtokólikterdiń tirkeý sanyn baqylaýdy, jol qozǵalysy erejesin óreskel buzǵan kólikerdi, jalpy kóshe tártibin baqylaýǵa baǵyttalatyn bolady»-deıdi Almaty qalasy ІІD Jedel basqarý Ortalyǵy bastyǵy, polıtsııa polkovnıgi Andreı Kvashının.
Onyń aıtýynsha, munymen qatar Almatyda qalalyq «Qaýipsiz qala» baǵdarlamasy engizilgen. "Bul shara aıasynda 70 turǵyn úı kesheni men myńǵa jýyq turǵyn-jaı qorǵaýǵa alyndy. Búgingi tańda Almatyda 22 myń podezderdiń 80-paıyzyna «domofon» ornatylýynyń arqasynda páter urlyǵynyń aldy alynýda. Bunymen qatar, turaqty túrde barlyq aýdandarda PIK basshylary ýchaskelik ýákildiń qatysýymen profılaktıkalyq jumystar júrgizýde. Bul jumystarǵa qoǵamdyq kómekshi otrıadtar da óz kómegin kórsetýde",-deıdi A. Kvashının.
