Almatyda qaterli isikti 1,5 kúnde anyqtaıtyn jańa baǵdarlama iske qosylady
ALMATY. QazAqparat - Almatyda naýryz aıynan bastap, qaterli isik aýrýyn tekseretin jańa baǵdarlama júzege asa bastaıdy. Ol týraly búgin Qazaq Ulttyq onkologııa jáne radıologııa ınstıtýtynyń dırektory Dılıara Qaıdarova aıtty, dep habarlaıdy QazAqparat tilshisi.
Dárigerlerdiń aıtýynsha, ortalyqta tekserilý shet eldegi medıtsına ortalyqtaryndaǵy dıagnostıkadan ótkennen aıtarlyqtaı arzan bolmaq.
«2018 jyldyń naýryz aıynan bastap, ınstıtýt qabyrǵasynda ortalyq ashylyp, check-up baǵdarlamasy boıynsha kez kelgen adam dıagnostıkadan óte alady. Bizdiń medıtsınalyq jabdyqtarymyzdyń barlyǵy jańa zaman talaptaryna saı, tsıfrlyq tehnologııalar. Mysaly, Koreıada tekserilýden ótý 3,5 myń AQSh dollary bolsa, bizde shamamen 50-60 myń teńgege tolyq tekserilip shyǵýǵa bolady», - dedi Dılıara Qaıdarova.
Dılıara Qaıdarovanyń aıtýynsha, qazirgi ýaqytta Dúnıejúzilik obyrǵa qarsylyq kúni aıasynda Qazaqstannyń barlyq qalasynda tegin tekserý júrgizilip jatyr.
«Bizdiń mamandarymyz Koreıa, Japonııaǵa baryp tálim alyp turady. 2017 jyly 22 dáriger shet elde biliktiligin arttyryp keldi. Naýryz aıynda bastalatyn baǵdarlama boıynsha kez kelgen adam 1,5 kún ishinde óziniń densaýlyǵynyń tolyq qorytyndysyn ala alady», - dedi ol.
Instıtýt basshysynyń aıtýynsha, Qazaqstandaǵy tegin skrınıng baǵdarlamasy boıynsha tek sút bezi, jatyr moıyny isigi, kolorektaldy obyrǵa ǵana tekserilýge bolady. Ol úshin elimizde 2,8 mlrd teńge bólingen.
Dúnıejúzilik obyrǵa qarsy kúres kúni 4 aqpanda jyl saıyn atalyp ótedi.
