Almatyda qaterli isikke shaldyqqandarǵa dári jetispeýshiligi túsindirildi
ALMATY. QazAqparat - Búgin Almatyda medıtsına mamandary qaterli isikke shaldyqqan naýqastardyń dárilik zattar tapshy degen shaǵymyna baılanysty túsinikteme berdi, dep habarlaıdy Qazaqparat tilshisi.
Almaty óńirlik kommýnıkatsııalar qyzmetinde qalalyq Densaýlyq saqtaý basqarmasy basshysynyń orynbasary Nurjan Isabekov, «Áleýmettik Medıtsınalyq Saqtandyrý qorynyń» Almatydaǵy bólimshesiniń dırektory Tóleýhan Ábildaev, «SK Farmatsııa» kompanııasynyń ókili Natalıa Zelenskaıa atalǵan jáıtke baılanysty túsinikteme berdi.
Nurjan Isabekovtyń aıtýynsha, dárilik zattyń ýaqytsha tapshylyǵy sút bezimen aýyratyn áıelderdiń sanynyń 5 paıyzǵa artýyna baılanysty bolyp otyr.
"Ár salada jyl sońynda qalada tirkelgen naýqastardyń sanyna qaraı tapsyrys beriledi. Qazir bul problema sút bezi qaterli isigimen aýyratyndarǵa dáriniń bir túri gertsıptın boıynsha bolyp tur. Naýqastardyń sany kóbeıgendikten dárilik zattar jetpeı qaldy. Byltyrǵymen salystyrǵanda olardyń sany 5 paıyzǵa artyp otyr", - dedi qalalyq Densaýlyq saqtaý basqarmasy basshysynyń orynbasary Nurjan Isabekov.
Mamandardyń aıtýynsha, Almatyda qazir 32 naýqas áıel aı saıyn gertsıptın preparatyn alyp turýy kerek. Ár naýqas 18 ampýlany 1,5 jylda qabyldaýy tıis. Bir ampýla quny 300000 teńgege baǵalanǵan. Atalǵan dári dárihanalarda satylmaıdy. Tek biryńǵaı dıstrıbıýtor «SK Farmatsııa» arqyly ǵana jetkiziledi.
"Bıyl Almatyda 5426 áıel esepte tur. 8 aıda taǵy 406 áıelden qaterli isik anyqtaldy. Byltyrǵymen salystyrǵanda 5 paıyzǵa artqan. Olardyń 32-si osy dárige muqtaj. Búginde 50 ampýla muqtaj adamdarǵa Qyzylorda oblysynan qaryzǵa alynyp berildi. Bizdiń tapsyrys jetken soń ornyna qaıtarylady", - dedi Almaty onkologııalyq ortalyǵynyń dırektory Nursultan Іzbaǵambetov.
Al dárilik zattyń ýaqytynda jetkizilmeýin «SK Farmatsııa» ókili Natalıa Zelenskaıa bylaısha túsindirdi.
«2018 jylǵa Almaty onkologııalyq dıspanseri 2,2 mlrd teńgege tapsyrys berdi. Tapsyrysty qarastyrý kezinde 1,9 mlrd teńgeniń ónimi maquldandy. 1,7 mlrd teńgeniń dárilik zattary jetkizildi. Gertsıptın preparaty Qazaqstanǵa qyrkúıekte jetkizilgen. Qazir sertıfıkatsııa protsedýrasynda tur», - dedi N.Zelenskaıa.
Endi qala bıligi tapshy dárilerdi jetkizýge bıýdjetten qosymsha qarjy qarastyrmaqshy.
«Bıyl Almaty onkologııalyq qyzmeti 2017 jylǵy deńgeıde qarjylandyryldy. Dárilik zattarmen qamtýda túıtkildi másele joq. Tek bir aýrý boıynsha dárilik zattyń bir túri jetkizilmeı jatyr. Oǵan qosymsha qajettilik týyndady. Bul máseleni bizdiń qordyń ortalyq apparaty men QR DSM apparaty jan-jaqty qarastyrýda», - dedi «Áleýmettik Medıtsınalyq Saqtandyrý qorynyń» Almatydaǵy bólimshesiniń dırektory Tóleýhan Ábildaev.
Onyń aıtýynsha, bıyl Almaty onkologııalyq qyzmetine 3 mlrd 222 mln teńge bólingen.
Aıta ketý kerek, Almaty qalalyq onkologııalyq ortalyǵynyń patsıentteri dárilik zattarǵa ýaqytynda qol jetkize almaı jatqandaryna shaǵymdanǵan bolatyn.
Aıtýlarynsha, tender utyp alǵan "SK-Farmatsııa" kompanııasy dárilerdi ýaqytynda jetkizbegen.
Jalpy bıyl Shveıtsarııadan quny 2,5 mlrd teńge bolatyn 55 ataýly dárilik zat jetkizý josparlanǵan.
