Almatyda qaterli dertke shaldyqqan balalarǵa mereke uıymdastyryldy

ALMATY. QazAqparat- Pedıatrııa jáne balalar hırýrgııasy ǵylymı ortalyǵynda Halyqaralyq balalardy qorǵaý kúnine oraı, qaterli dertke jáne sırek kezdesetin aýrýlarǵa shaldyqqan balalar úshin «Balbóbek — balapan, jaıshy maǵan alaqan» atty merekelik shara ótti, dep habarlaıdy QazAqparat tilshisi.

Merekelik shara «Almaty Symphony» Almaty sımfonııalyq orkestriniń kontserttik baǵdarlamasymen ashyldy.

Pedıatrııa ortalyǵynyń dárigerleri men meıirbıkeleri kishkentaı patsıentterdi dástúr boıynsha fleshmob arqyly quttyqtady.

Sonymen qatar, ortalyqta júıeli túrde em qabyldaıtyn Symbat Qurmanbek, Arına Gorohova, Aıajan Úkibaı jınalǵandarǵa óleń oqyp, bı bılep, án saldy.

Shara barysynda «sýret jáne qolóner» kórmesine balalardyń qolynan shyqqan týyndylar qoıyldy.

Ertegi men mýltfılm keıipkerleri balalarmen estelikke sýretke tústi. Al anımatorlar búldirshinderdiń kóńilin kóterip, túrli oıyndar oınady.

Merekelik shara sońynda balalarǵa syılyqtar men táttiler taratyldy.

Foto: gov.kz