Almatyda «Qasym han» fılminiń kastıngi qalaı júrip jatyr

Tarıhı týyndynyń birinshi kezeńi 25 serııadan turady. Búgin Qazaqfılm alańynda alǵashqy kastıngke fototúsirilim ótti.

«Túsirilim jumystary jazda shilde aıynda bastalady. 25 qańtardan bastap kastıng jarııaladyq. Osy ýaqytqa deıin 5 000 adam keldi. Poshta arqyly 9000 adamnyń málimetin aldyq. 12 naýryzda Qazaqstannyń barlyq óńirlerinde kastıng bastalady», - dedi kastıng-prodıýser Alma Baımuratova.

Tarıhı týyndyǵa stsenarııdi birneshe adam jazyp jatyr. Top jetekshisi - dramatýrg, «Qazaqfılm» AQ sarapshylar keńesiniń tóraǵasy Bekbolat Shekerov.

«Qatysqysy keletinder óte kóp. Biraq bizge tabıǵı sulýlyq kerek. Almatyda 3-80 jas aralyǵyndaǵy adamdardy izdep jatyrmyz. Al óńirlerde 15-45 jas aralyǵynda izdeımiz. Sonymen qatar, er adamdardyń boıy 180 santımetrden tómen bolmaýy tıis. Jáne eki ıyǵy keń, jaýyryny qaqpaqtaı, daýsy jýan bolǵany abzal. Kelgen balalardyń da eń aldymen bet-júzine nazar aýdaramyz. Balada jasandylyq bolmaıdy. Birinshi týr - fototúsirilim. Bul týrda biz qatysýshylardyń emotsııasyn baqylaımyz. Odan ótken adamdardy ekinshi týrǵa - vıdeotúsirilimge shaqyramyz»,- deıdi Alma Baımuratova.

Jobaǵa kórkemdik jetekshilik etýge «Ertýrgýl» kınosynyń rejısseri Metın Gıýnaı shaqyryldy. Kimniń bas rejısser bolatyny áli belgisiz. Qazir qoıýshy-sýretshiler kostıýmderdiń eskızin Túrkııa mamandarymen talqylap jatyr.

«Búgingi kastıngke otbasymyzben, joldasym, ulym, kúıeýbalam - bárimiz keldik. Kastıng jaıly dostarymyzdan estidik. Bárimiz drama teatry jáne kıno akterimiz. Men Reseıde oqydym. Qazaqstanǵa 2 jyl buryn keldim. Birqatar otandyq jobalarǵa qatysyp úlgerdim. J.Elebekov atyndaǵy tsırk kolledjinde akterlik sheberlik pen sahna tilin oqytamyn», - deıdi ıAroslavl qalasy teatr ınstıtýtynyń túlegi Ásel Gújmanova.

Ásel Gújmanova Reseıde «Nıka», «Chernaıa reka», «Mashına lıýbov» serıaldaryna túsken.

Esterińizge sala ketsek, qazaqtyń uly handarynyń biri - Qasym hannyń ómiri týraly baıandaıtyn kınojobany QR Mádenıet jáne sport mınıstrligi tapsyrysy boıynsha Sh.Aımanov atyndaǵy «Qazaqfılm» AQ túsiredi.

25 qańtar kúni Qazaqstannyń túkpir-túkpirinde kastıng bastaldy. Úmitkerlerge qoıylatyn basty talap - qazaq tilin bilýi.