Almatyda Qasym Amanjolov ánderiniń tuńǵysh keshi bolady
ALMATY. 16 mamyr. QazAqparat - Almatyda 17 mamyrda Ómirbek Joldasbekov atyndaǵy Stýdentter saraıynda «Qasymnyń ánderi-aı» dep atalatyn atty án keshi ótedi.
Qasym Amanjolov shyǵarmalaryn ulyqtap, halyqqa nasıhattaý maqsatyndaǵy bul sharany ánshi Gúlbarshyn Tergeýbekova bastaǵan bastamashyl top uıymdastyryp otyr. Ol Q.Amanjolov ánderiniń eń alǵashqy án keshi bolmaq. Oǵan Eskendir Hasanǵalıev, Maqpal Júnisova, Qaraqat Ábildına, Altynaı Jorabaeva, Merýert Túsipbaeva, Jolbarys Seıfýllın, Janar Aıjanova, Rymkesh Jumadilova, Saıat Ábdiǵalı, Alma Amanjolova, Erlan Tóleýtaı, Talǵat Ábýǵazy, Erlan Qujymanov, Seıil Aıaǵan, Abaı Ábishev pen «Kaspıı», «Tarlan» toptary qatysady dep josparlanýda. Kesh barysynda sondaı-aq, Ulyqbek Esdáýlet, Qasymhan Begimanov sııaqty aqyndar Q.Amanjolov rýhyna arnaǵan óz jyrlaryn oqyǵaly otyr.
Qasym Amanjolov 1911 jyly 10 qazanda qazirgi Qaraǵandy oblysynyń Qarqaraly aýdanyndaǵy Qyzylaraı qystaýynda dúnıege kelip, 1955 jyly 18 qańtarda kóz jumdy. Áke-shesheden jastaı jetim qalǵan onyń Semeı mal dárigerlik tehnıkýmynda oqyp júrgende jazǵan alǵashqy óleńderi qabyrǵa gazetinde jarııalanyp turǵan. 1933-35 jyldary ásker qatarynda bolǵan soń Oraldyń teatr trýppasyn uıymdastyryp, kórkemdik jetekshisi bolady. Ony az ýaqytta teatrǵa aınaldyrǵan Q.Amanjolovtyń aqyndyq, ánshilik, artıstik talanty jurtshylyqqa osy kezde keń tanylady. Al 1936-1941 jyldary Almatyǵa kelip qazirgi «Egemen Qazaqstan», «Jas Alash» gazetteri men Jazýshylar odaǵynda qyzmet istep, 1938 jyly «Ómir syry» degen tuńǵysh óleńder jınaǵyn jáne 1941 jyly Maıakovskııden aýdarǵan óleńderin «Bar daýyspen» degen atpen jeke jınaq etip jarııalady. El basyna aýyr kún týǵan maıdanǵa attanyp, soǵystyń basynan aıaǵyna deıin qatysady. Odan keıin ár jyldary «Daýyl», «Balbóbek», «Nurly dúnıe» kitaptary men «Tańdamaly shyǵarmalar» jınaqtary basylyp shyqty.
