Almatyda kaskaderlar 1 myń balany atqa mingizip úıretedi

ALMATY. QazAqparat - Almatyda «1 000 qaıyrymdy is» baǵdarlamasy aıasynda mamandar 8-9 jas aralyǵyndaǵy balalardy tegin atqa minýge jáne sýda júzýge úıretedi. Bul týraly «QazAqparat» tilshisi qalalyq dene shynyqtyrý jáne sport basqarmasyna silteme jasaı otyryp habarlaıdy.

«1000 qaıyrymdy is» baǵdarlamasynyń negizinde 23 qazanǵa deıin 1 myń balany júzýge, jeltoqsan aıyna deıin 1 myń balany atqa minýge úıretý josparlanyp otyr.

Basqarmadaǵylardyń aıtýynsha, birinshi kezekte balalar úıi men az qamtylǵan otbasylardyń balalaryn atalǵan sharaǵa qatystyrý josparlanǵan.

Qazirgi ýaqytta kásibı mamandar balalardy qaladaǵy 5 basseın kesheninde jattyqtyryp jatyr.

Atqa minýdi «NOMAD» kaskaderlar toby úıretedi.