Almatyda kásiptik bilimge bólinetin bıýdjettik oryndar sany artty
ALMATY. QazAqparat- Almatyda mektep túlekteri oqýǵa túse alatyn kolledjderge 14 905 bıýdjettik oryn bólindi. Bul 2021 jylmen salystyrǵanda 3500 orynǵa artyq. Bul týraly brıfıng barysynda Almaty qalalyq bilim basqarmasy tehnıkalyq jáne kásiptik bilim berý basqarmasynyń basshysy Erik Ábishaev aıtty, dep habarlaıdy QazAqparat tilshisi.
Spıker 2022 jylǵy túlekterge bolashaq bilim traektorııasyn anyqtaý úshin kolledjderge tapsyrar aldynda kásibı dıagnostıkadan ótýdi usyndy. Kásibı dıagnostıkadan gz.bilimalmaty.kz saıtynda ótýge bolady.
«Bıyl Almatynyń orta arnaýly oqý oryndary men lıtseılerine qabyldaý naýqany 25 maýsymnan 25 tamyzǵa deıin jalǵasady. Keshki jáne syrttaı oqýǵa qujattardy qabyldaý merzimi 25 maýsym men 20 qyrkúıek aralyǵynda. Bul rette shyǵarmashylyq daıyndyqty qajet etetin mamandyqtar boıynsha oqýǵa qujattar 20 shildege deıin, al pedagogıkalyq jáne medıtsınalyq mamandyqtar boıynsha 15 tamyzǵa deıin qabyldanady», — dedi Erik Ábishaev.
Memlekettik qoldaýdyń arqasynda barlyq talapkerler tegin oqý múmkindigine ıe boldy, ol úshin elektrondy úkimet pen gz.bilimalmaty.kz portaldary arqyly qujattaryn tapsyrý qajet, sonymen qatar kolledjge qabyldaý jónindegi tehnıkalyq hatshylarǵa júgine alady.
«Orta býyn mamany biliktiligin tańdaǵan árbir talapkerdiń tórt mamandyq pen tórt kolledjge deıin tańdaý múmkindigi bar. Mamandyq tańdaý kezinde gz.bilimalmaty.kz portalyna tirkelip, qujattardy tikeleı kolledjge tapsyrý qajet», - dep túsindirdi spıker.
Sonymen qatar, ol Almatyda mektep túlekteri oqýǵa túse alatyn kolledjderge 14 905 bıýdjettik oryn bólingenin jetkizdi.
Bul 2021 jylmen salystyrǵanda 3500 orynǵa artyq. Eńbek biliktiligine túsetin tulǵalar úshin kolledj kásiptik jaramdylyq boıynsha áńgimelesýdi uıymdastyrady, al eger memlekettik tapsyrys boıynsha orynǵa úmitkerler kóp bolsa, sertıfıkattyń ortasha baly jáne kvota sanatynyń bolýy basty mánge ıe bolamaq.
Almaty qalalyq Bilim basqarmasynyń tehnıkalyq jáne kásiptik bilim berý basqarmasynyń basshysy Erik Ábishaev bıýdjetke túsetinder arasynda konkýrstyq testileý merzimin aıtty.
«Negizgi orta bilim negizinde oqýǵa túsetin tulǵalar arasyndaǵy konkýrs 19-22 tamyz aralyǵynda, jalpy orta bilim berý bazasynda jáne TjKB bazasynda 22-25 tamyz aralyǵynda ótedi. Óner jáne mádenıet mamandyǵyna túsetinder úshin 29 shilde men 2 tamyz aralyǵynda irikteý ótedi», - dedi spıker.
