Almatyda kásiporyndardyń eńbekaqyǵa bereshegi 1,3 mıllıard teńgeni qurap otyr
ALMATY. Qarashanyń 9-y. QazAqparat /Erlik Erjanuly/ - Almatyda qazirgi tańda 35 kásiporyn jumysshylarǵa 1 mıllıard 320 mıllıon teńge bereshek.
Bul derek búgin Almatyda ótken «Álemdik qarjylyq daǵdarys jaǵdaıyndaǵy Úkimet, Kásipodaq federatsııasy jáne Ónerkásipshiler men kásipkerler odaǵynyń arasyndaǵy Úshjaqty kelisim. Jumys ornyn saqtap qalý memorandýmyn júzege asyrýdy baǵalaý» dep atalatyn respýblıkalyq konferentsııada aıtyldy, dep habarlaıdy QazAqparat.
«Bıyl tekserý kezinde Almatyda 110 kásiporyn men uıymnyń jalpy somasy 3 mıllıard 546 mıllıon teńge kóleminde eńbekaqyǵa qaryzy bar ekeni anyqtaldy. Osy ýaqytqa deıin olardyń ishinen 82 kásiporyn 2 mıllıard 220 mıllıon teńgeniń bereshegin qaıtardy. Qarashanyń 4-degi jaǵdaı boıynsha qazir 1 mıllıard 320 mıllıon teńge kóleminde qaryzy bar 35 kásiporyn bar», deıdi Eńbek jáne halyqty áleýmettik qorǵaý mınıstrligi qalalyq departamentiniń eńbek qatynastary bóliminiń basshysy Sholpan Esentaeva. Onyń aıtýynsha, Almatydaǵy jumysshylar aldynda eńbekaqyǵa degen bereshegi bar óndiris oryndary negizinen qurylys salasyndaǵy kásiporyndar. Sonyń biri - «Qýat» korporatsııasy. Onyń jumysshylar aldyndaǵy qaryzy 689 mıllıon teńgeni qurap otyr. Jyl basynan beri jalpy eńbek tártibine baılanysty 1060 kásiporyn men uıym tekserilip, olardan 7509 zańbuzýshylyq anyqtaldy. Olardyń ishinde keń taraǵany - eńbek kelisimin jasamaý, eńbekaqyny jáne Eńbek kodeksinde qarastyrylǵan ótemaqylardy tólemeý.
