Almatyda kásipkerlik sýbektilerin qoldaýdyń qandaı sharalary bar
ALMATY. QazAqparat – Óńirlik kommýnıkatsııalar qyzmetiniń alańynda ótken onlaın-brıfıng barysynda «Almaty» Áleýmettik-kásipkerlik korporatsııasy» AQ basqarma tóraǵasy Asqar Bilisbekov kásipkerlikti qoldaýdyń qolda bar tetikteri týraly aıtty, dep habarlaıdy QazAqparat tilshisi.
Onyń málimetinshe, shaǵyn óndiristik parkter, statsıonarly emes saýda nysandary, qyzmet kórsetý ortalyqtary kiretin shaǵyn jáne orta bıznesti qoldaý baǵdarlamalary – bul ÁKK qyzmetindegi mańyzdy baǵyttardyń biri.
«Qyzmet kórsetý ortalyqtaryna keletin bolsaq, bul – qyzmet kórsetý salasynda shaǵyn jáne orta kásipkerlikti damytý úshin qurylatyn úı-jaılar kesheni (kıim jýý, bylǵarydan jasalǵan buıymdardy jóndeý, aıaq kıim, tehnıka jóndeý oryndary, atele jáne taǵy basqalary).
Qyzmet kórsetý ortalyqtaryn qurýdyń artyqshylyqtary:
- paıdalanylmaı turǵan úı-jaılardy rekonstrýtsııalaý;
- qyzmet kórsetý salasyndaǵy bıznes úshin ınfraqurylymdy damytý;
- shaǵyn bıznesti kóleńkeden shyǵýǵa yntalandyrý»,– dedi Asqar Bilisbekov.
Sonymen qatar, ol Almaty Finance enshiles uıymdary jáne «Almaty» mıkroqarjy uıymy arqyly shaǵyn jáne orta bıznesti jeńildikpen nesıelendirý úshin Almaty Business-2025 baǵdarlamasy iske asyrylyp jatqanyn aıtty.
«Almaty» Áleýmettik-kásipkerlik korparatsııasy» balansynda jer ýchaskeleri men jyljymaıtyn múlik nysandary túrindegi aktıvter bar. Olardyń negizinde áleýmettik jáne kommertsııalyq jobalar iske asyrylady. 2020 jyldyń qarasha aıynda Áýezov aýdanynda «Boks mektebi» sport zaly ashyldy. Onda kúndelikti 40-tan astam bala tegin túrde sportpen shuǵyldana alady. Sondaı-aq, bıyl Á. Qasteev atyndaǵy óner mektebi jumys isteı bastady. Mektep balalar shyǵarmashylyǵyn dáripteý, halyqaralyq mádenı jáne bilim almasý boıynsha úlken jumystar júrgizedi, halyqaralyq festıvalderge qatysady»,– dedi spıker.
Áýezov aýdanynda «Baqytty otbasy» ortalyǵy janynan kópbalaly analardy quqyqtaný, aspazdyq sheberlik, ulttyq qolóner, tigin sheberligi, sulýlyq salony qyzmetteri men qarjylyq saýattylyq boıynsha oqytatyn «Іsker ana» baǵdarlamasy jumys isteıdi.
«Jaqynda qabyldanǵan strategııany jáne oryndalatyn fýnktsııalardy biriktirýdiń aǵymdaǵy protsesin eskere otyryp, qalanyń áleýmettik jáne ekonomıkalyq damýynda kompanııanyń róli áli de damý ústinde. Almaty qalasynyń ÁKK kommertsııalyq qyzmetin keńeıtip, ınvestıtsııalyq jobalardy júzege asyrýǵa nıetti, olar jeke ınvestorlar men kompanııanyń jeke resýrstary esebinen birlesip qarjylandyrylatyn bolady», - dep atap ótti A.Bilisbekov.
Qazirgi ýaqytta Almaty Invest jumysynda 884 mlrd teńgege 5 serpindi joba bar.
