Almatyda kásipkerlerdi sanıtarlyq tekserý talaptary azaıdy
ALMATY. QazAqparat - Búgin Almatyda SmArt Point bazasyndaǵy «Open Almaty» qoǵamdyq qabyldaýynda Almaty qalalyq Qoǵamdyq densaýlyqty qorǵaý departamentiniń ókilderi kásipkerlermen kezdesý ótkizdi.
Jıyn barysynda ońtaılandyrylǵan sanıtarlyq tekserý sharttary týraly aıtyldy.
Otyrysqa 200 jýyq kásipker keldi.
Departament basshysy Aızat Moldaqasymovanyń aıtýynsha, bıyl QR DSM bıznesti tekserýdiń sanıtarlyq normalary men erejeleri qysqartqan.
«Mınıstrlik sanıtarlyq normalardy qarap shyqty. Sonyń nátıjesinde 6 ereje ońtaılandyryldy, 29 ereje alynyp tastaldy. Birneshe silteme jazylǵan tekserý paraǵy alynyp tastalyp, ornyna 41 tekserý paraǵy engizildi. Buryn tekserý paraǵynda 11 myń talap bolsa, endi 1740 talap qaldy. Meniń oıymsha, bul sandardyń ózi bıznes úshin ákimshilik kedergini alýda kóp septigin tıgizeri anyq», - dedi Aızat Moldaqasymova.
Alaıda departament basshysy kásipkerler tarapynan zań buzýshylyq sany áli de azaımaı otyrǵanyn aıtty.
«Byltyr qalada 1 dámhanada 29 adam salmonelez juqtyryp, ýlanǵan bolatyn. Sot arqyly dámhananyń jumysy toqtatyldy. Alaıda, qazir nysan basqa zańdy tulǵanyń atyna tirkelip, qaıtadan jumys istep tur. Buryn 50 adam otyratyn bolsa, qazir 200 adamǵa deıin keńeıtip aldy. Bıyl da 6 adam bir dámhanadan ýlandy. Іs sotqa berildi, sot sheshimi shyqty. Biraq sot oryndaýshylary belsendilik tanytpaı otyr. Sondyqtan, sizder qyzmet usynýshylar retinde memlekettiń berip jatqan jeńildikterine áleýmettik jaýapkershilik tanytqandaryńyz jón», - dedi ol.
Onyń aıtýynsha, bıyl ekinshi jartyjyldyqta 206 sulýlyq salony, 141 emdeý profılaktıkalyq mekemesi, 5 bazar, 3 zerthana, 154 saýda nysany tekserýden bosatyldy. 26 nysannyń jumysy sot arqyly toqtatyldy.
Jıyn barysynda qalalyq Qoǵamdyq densaýlyqty qorǵaý departamenti men Almaty qalalyq kásipkerler palatasynyń densaýlyq saqtaý sektory arasynda ózara yntymaqtastyq týraly memorandýmǵa qol qoıyldy.
