Almatyda kásipkerdi zańsyz teksergen salyq qyzmetkerleri aıyppul tóledi

ALMATY. QazAqparat – Almaty qalasy Naýryzbaı aýdanynyń prokýratýrasy kásipkerler quqyǵynyń buzylǵanyn anyqtady, dep habarlaıdy QazAqparat tilshisi.

Qadaǵalaý organynyń málimetinshe, Naýryzbaı aýdany boıynsha Memlekettik kirister basqarmasynyń qyzmetkerleri azamatsha D.-nyń aryzy boıynsha saýda dúkeninde tekserý júrgizigen. Salyq qyzmetkerleri jeke kásipkerge aldyn ala tekserý júrgizý týraly habarlama jibermegeni jáne aryzdanýshynyń eshqandaı dálelder usynbaǵany anyqtaldy.

Kásipkerlik kodekstiń 144-babynyń 5-bóligi 3-tarmaǵyna sáıkes, baqylaý men qadaǵalaý sýbektilerin jospardan tys tekserýge senimdi negizder jáne rastaıtyn dáleldemeler bolǵan kezde Qazaqstan Respýblıkasy zańnamasynyń talaptaryn buzýshylyqtar boıynsha jeke jáne zańdy tulǵalardyń joldanymdary negiz bola alady.

«Osylaısha, salyq organdarynyń qyzmetkerleri QR Prezıdentiniń «Qazaqstan Respýblıkasynda tekserýlerdi jáne profılaktıkalyq baqylaý men qadaǵalaýdy baryp júrgizýge moratorıı engizý týraly» jarlyǵynyń jáne QR Kásipkerlik kodeksiniń talaptaryn buzdy», - dep habarlady prokýratýradan. Aýdan prokýratýrasynyń qaýlysymen Naýryzbaı aýdany boıynsha memlekettik kirister basqarmasynyń qyzmetkerleri QR ÁQBtK 175-babynyń 1-bóligi boıynsha ákimshilik jaýapqqa tartylyp, 20 AEK mólsherinde aıyppul tóledi.