Almatyda kásipkerdi tonap, 200 myń dollaryn alyp ketken 3 qaraqshy qolǵa tústi
ALMATY. 12 qarasha. QazAqparat /Erbol Turymbetov/ - 2009 jyldyń qazan aıynda Qytaıdan júk tasymaldaýmen aınalysqan kásipker áıelge qarýly qaraqshylyq shabýyl jasalyp, onyń 200 myń AQSh dollary jáne oǵan qosa qosa tórt uıaly telefon qoldy bolǵan-dy.
Bet-beınelerin jasyrǵan birneshe adam áıeldiń úıine tańsáride shabýyldap, úı ıesiniń qol-aıaǵyn matap qaldyrǵan edi.
«Polıtsııaǵa áıel birneshe saǵattardan soń shaǵym túsirgen. Sondyqtan qylmystyń izin sýytpaı ashý múmkin bolmady. Alaıda qylmys ornynan qylmystyń ashylýyna muryndyq bolǵan aıǵaq zattar tabyldy. Jarty jyldan soń atalǵan qylmysqa qatysty shyǵysqazaqstandyq 29 jastaǵy O. esimdi azamat qolǵa tústi. Onyń buryn da bótenniń múlkin urlaǵany úshin sotty bolǵany málim boldy», - dedi Almaty qalasy ІІD Krımınaldy polıtsııa basqarmasynyń qarýly shabýyldardy ashý bóliminiń bastyǵy, polıtsııa podpolkovnıgi Azamat Palmanov.
Atalǵan qylmysqa qatysy bar delingen taǵy eki qylmysker ótken jeksenbide tutqyndaldy. Olar jarty jyl buryn qolǵa túsken O-nyń jerlesteri bolyp shyqty.
«Urlanǵan aqshalardy jaratyp úlgergenimen, olar zań tegeýrininen qashyp qutylmaıdy. Buryn sottalmaǵan olardyń eń jasy 25-te bolsa, úlkeni 30 jasta. Olar qarýly shabýyl kezinde betperde kıse de jábirlenýshi jazbaı tanydy. Jábirlenýshi óziniń este saqtaý qabiletiniń arqasynda qaraqshylardy daýystary arqyly esine túsirdi», - dedi A. Palmanov.
Onyń aıtýynsha, qaraqshy top músheleri bul qylmysqa áldekimniń aqparaty arqyly barǵandaryn jasyrmaǵan. A. Palmanov endi aqparat berýshilerdiń izdestirilip jatqanyn málim etti.
