Almatyda kásipkerden 14 mln teńge para alǵan máıithananyń eks-dırektory sottaldy
Búgin Almaty qalasy Medeý aýdanynyń №2 sotynda qalalyq patologoanatomııalyq bıýronyń burynǵy dırektory Baqytjan Álibekovke qatysty úkim shyqty.
Ol kásipkerden 14 mıllıon teńge kóleminde para aldy dep aıyptaldy.
«Álibekov Qazaqstan Respýblıkasy Qylmystyq kodeksiniń tórt baby boıynsha - 24-baptyń 3-bóligi, 366-baptyń 3-bóligi 3-tarmaǵy, 189-baptyń 3-bóligi 1, 2-tarmaqtary, 364-baptyń 1-bóligi boıynsha kináli dep tanyldy. Ol 8 jylǵa bas bostandyǵynan aıyryldy. Jazasyn ortasha qaýipsizdik deńgeıindegi mekemede óteıdi»,- dep habarlady Almaty qalasy Medeý aýdany №2 sotynyn baspasóz qyzmeti.
Ol sondaı-aq budan bylaı memlekettik qyzmette, sotta, jergilikti ózin-ózi basqarý organdarynda, ulttyq bankte jáne qarjy naryǵyn qadaǵalaý organdarynda qyzmet ete almaıdy.
«Álibekovtiń kámeletke tolmaǵan balasy bar ekeni sondaı-aq bul onyń alǵash jasaǵan qylmysy ekeni ári qylmysty aýyrlatatyn mán-jaılar joqtyǵy eskerildi», - dep habarlady sottan.
Sot úkimi zańdy kúshine engen joq.
Eske sala ketsek, máıithananyń burynǵy dırektory Baqytjan Álibekovty ótken jyldyń qazan aıynda Almaty qalalyq prokýratýrasy sybaılas jemqorlyqqa qarsy qyzmetpen birlese ustady.