Almatyda kásipker mektepke stadıon salyp berdi
ALMATY. QazAqparat - Almatyda memlekettik-jekeshelik áriptestik aıasynda salynǵan mektep stadıony búgin paıdalanýǵa berildi, dep habarlaıdy QazAqparat tilshisi qalalyq ákimdikke silteme jasap.
Bostandyq aýdanyndaǵy №40 mekteptiń qasynda bolǵan saltanatty jıynǵa qala ákimi Baýyrjan Baıbek pen bıznes salasynyń ókilderi qatysty.
Nysannyń terrıtorııasynda úsh fýtbol alańy, tennıs korty, basketbol alańy, krossfıt (kóshe trenajery), júgirý joly, jýynatyn jáne kıinetin bólmeler bar.
Jańa sport nysanynda bir mezette 200 oqýshy sportpen aınalysa alady.
Aıta ketý kerek, áleýmettik nysannyń qurylysy bıyl jazda bastalǵan edi.
Osyǵan uqsas jobany jeke kásipker Aqylbek Aqqaıyr Almaly aýdanyndaǵy №95 jalpy bilim beretin mektepte júzege asyryp jatyr. Eki stadıonnyń qurylysyna 350 mln teńgege jýyq qarjy ketti.
«Biz eń aldymen balalardyń qaýipsizdigi men yńǵaılylyq, jer silkinisine tózimdiligine mán berdik. Qurylys barysynda eń zamanaýı tehnologııalardy qoldandyq. Alańǵa baktırıtsıdti jáne jaǵymdy hosh ıisi bar sapaly gazon tóseldi. Qulaǵan kezde bala jaraqat almaıtyn bolady», - dedi «Aqylbek» JShS dırektory Aqylbek Aqqaıyr.
Kelisimshartqa sáıkes ınvestor nysandy 10 jylǵa deıin paıdalanatyn bolady (10 jyldan asýy da múmkin) Odan soń tolyǵymen memleketke qaıtarady.
Aıta ketý kerek, atalǵan jobaǵa Qalalyq kásipkerler palatasy konsýltatıtvtik kómek kórsetti.
«Memlekettik-jekelik áriptestik bılik pen bıznestiń arasyndaǵy áriptestiktiń tıimdi tetigi. Bıýdjet áleýmettik nysandardy salýǵa qarajat jumsamaıdy. Jyl basynan beri kásipkerler palatasyna 70-ten asa kásipker kelip keńes alǵan. Olardyń 11-i memlekettik-jekelik áriptestik ornatýǵa nıet bildirdi», - dedi Almaty qalalyq kásipkerler palatasy apparatynyń basshysy Nurlan Qabyshtaev.
Memlekettik-jekeshelik áriptestik aıasynda memleket seriktesine tegin jer ýchaskesin beredi. Investor nysannyń qurylysyna, qaıta jańǵyrtýǵa qarajat salady. Mektep bul nysandy tańerteńgi 9.00 men 19.00 arasynda paıdalana alady. Qalǵan ýaqytta kásipker nysandy kommertsııalyq baǵytta qoldana alady.
Illıýstratsııalyq sýret
