Almatyda kásibı tutynýshylar úshin METRO kóterme saýda ortalyǵy ashyldy
; ALMATY. Qyrkúıektiń 29-y. QazAqparat /Ádilet Musahaev/ - Búgin Almatyda birinshi METRO kóterme saýda ortalyǵynyń ashylý saltanaty ótti.
METRO Cash & Carry International-dyń Bas atqarýshy dırektory Frans Mýllerdiń aıtýynsha, aýmaǵy 6 880 sharshy metr saýda ortalyǵynda 13 myń azyq-túlik pen basqa da 12 myń ataýdan turatyn taýarlar satylady. Tutynýshylarǵa dúkenge kirýge, saýda jasaýǵa múmkindik beretin tutynýshy kartasy beriledi jáne olarǵa yńǵaıly bolý úshin saýda ortalyǵy tańǵy 8-den keshki 23-ke deıin jumys isteıdi.
"Almaty Qazaqstannyń eń úlken qalasy jáne saýda ortalyǵy, sol sebepten de METRO-nyń damýy úshin mańyzdy qala bolmaq. Búgingi bizdiń saltanatty túrde ashylýymyz Qazaqstandaǵy ornymyzdyń úlesin nyǵaıtyp, keleshekte damýymyzdyń negizi bolatynyna senemiz", deıdi F.Mýller.
Almaty qalasynyń ákimi Ahmetjan Esimov qalada «Magným» jáne «Arzan» syndy kóterme saýda ortalyqtary burynnan jumys isteıtindigin, biraq tanymal álemdik brendtke ıe iri saýda ortalyǵy alǵash ashylyp otyrǵandyǵyn aıtty. Mundaı saýda ortalyǵy ótken jyly qazan aıynda Astana qalasynda Elbasy N.Nazarbaevtyń qatysýymen ashylǵan bolatyn. "Osynda kelerdiń aldynda Astanadaǵy METRO-nyń jumysyn zertteýdi tapsyryp, ondaǵy saýda ortalyǵynyń jumysy sátti júrip jatyr jáne óz mindetterin túgeldeı oryndap, memleket qazynasyna quıylatyn salyqty durys tólep otyr degen jaýap aldym", deıdi qala ákimi.
Sonymen qatar ol ótken jyly daǵdarysqa qaramastan qaladaǵy kóterme saýda óskendigin jáne sońǵy 7 aıda 9 paıyzǵa deıin kóterilgendigin aıtyp ótti. "Bul jaqsy kórsetkish, sondyqtan qalalyq úkimet sheteldik ıvestorlardyń bizdiń naryqqa qoryqpaı kelip, osynda órken jaıýy úshin barynsha eńbek etedi", dep atap ótti A.Esimov.
Mundaı dúkenniń ınvestıtsııasy 15 mıllıon eýrony quraıdy eken. Álem boıynsha 670 osyndaı saýda ortalyǵy bar bolsa, Qazaqstan osy jeli iske qosylǵan 31-shi el bolyp otyr.
