Almatyda qashyqtan oqytýda tehnıkalyq aqaýlar anyqtaldy

ALMATY. QazAqparat – Almaty qalasynyń Bilim basqarmasy qashyqtan oqytýdaǵy tehnıkalyq máselelerdi jaqyn kúnderi sheshýge ýáde berdi, dep habarlaıdy QazAqparat tilshisi.

Qalalyq bilim berýdegi jańa tehnologııalardyń ǵylymı-ádistemelik ortalyǵynyń dırektory Andreı Dýpıktiń aıtýynsha, ınternet platformalardaǵy aqaý shamadan tys júktemeniń túsýine baılanysty bolǵan.

«Búgin qala mektepterindegi 290 myń oqýshy 50-den asa serverdi paıdalanyp, qashyqtan oqyp jatyr. Bir kúnde jáne bir ýaqytta 3 myń bala kirdi. Sondyqtan tehnıkalyq aqaý oryn aldy. Qazirgi tańda serverlerdiń úzdiksiz jumys isteýin qamtamasyz etip, olardyń qýatyn arttyrý úshin jelilik múmkindikter qaralyp jatyr. Barlyq tıis shara qabyldanady», - deıdi Andreı Dýpık.