Almatyda qarjy pıramıdasynyń eki uıymdastyrýshysy ustaldy

ASTANA. QazAqparat - Qarjylyq monıtorıng agenttigi Almaty qalasy boıynsha departamenti Chia Tai Tianging qarjy pıramıdasyn qurý jáne basqarý faktisi boıynsha tergeý júrgizýde, dep habarlaıdy QazAqparat.

Vedomstvonyń málimetinshe, kásiporyn taǵamdyq qospalar men basqa da dári-dármekterdi óndirýge ınvestorlardan qarajat tartqan. Ózinen keıin adamdardy alyp kelgen salymshylarǵa bonýs tóleý ýáde etildi. Aıta ketý kerek, Chia Tai Tianging Qazaqstan aýmaǵynda zańdy tulǵa retinde tirkelmegen.

Qazirgi ýaqytta QMA Almaty qalasy boıynsha departamenti atalǵan seriktestiktiń eki belsendi basshysyn ustap, olar ýaqytsha ustaý ızolıatoryna qamaldy.Basqa uıymdastyrýshylardy anyqtap tabý boıynsha is-sharalar jalǵasýda.

QMA azamattardy qyraǵy bolýǵa jáne jınaqtaryn kúmándi qarjy ınstıtýttaryna salmaýǵa shaqyrady.

Eger siz jáne sizdiń jaqyndaryńyz Chia Tai Tianging áreketinen zardap shekse, QMA sall-ortalyǵyna habarlasyńyz.