Almatyda qarjy ónimderiniń dástúrli kórmesi uıymdastyrylady
ALMATY. 17 qarasha. QazAqparat /Erlik Erjanuly/ - Almatyda 19-21 qarasha kúnderi "Mega Alma-Ata" saýda oıyn-saýyq ortalyǵynda QR halqynyń ınvestıtsııalyq mádenıeti men qarjylyq saýattylyǵyn arttyrýdyń 2007-2011 jyldarǵa arnalǵan baǵdarlamasy aıasynda qarjy ónimderiniń dástúrli kórmesi ótedi.
Oǵan QR Almaty qalasyndaǵy óńirlik qarjy ortalyǵy qyzmetin retteý agenttigi (AÓQO QRA) uıytqy bolyp otyr. Agenttik tóraǵasynyń orynbasary Darhan Nurpeıisovtyń aıtýynsha, bul shara alǵash ret byltyr Almatyda uıymdastyrylǵan. Sol kezde-aq onyń jyl saıyn ótetin dástúrli sharaǵa aınalatyny belgili boldy. Bıyl sáýir aıynda mundaı shara Astanada da ótti.
"Qarjy ónimderi kórmesiniń basty maqsaty - halyqty dıllerlik jáne brokerlik kompanııalardyń qyzmetimen bir jerden tanystyrýǵa múmkindik jasaý. Bıylǵy kórmeniń basty ereksheligi, oǵan ınvestorlardyń jańa kategorııasynyń qosylýy bolyp otyr. Bular - memlekettik qyzmetkerler. Olarǵa aǵymdaǵy jyldyń qańtar aıynan bastap qundy qaǵazdar satyp alý quqy berildi. Demalys kúnderimen tuspa-tus kelgendikten qarjy ónimderiniń kórmesine bul joly memlekettik qyzmetkerlerdiń de barýyna múmkindik jasalyp otyr. Sondaı-aq onda brokerlik kelisimsharttar jasaýǵa, tegin ótetin qarjylyq saýattylyqty kóterýge arnalǵan semınarlarǵa qatysýǵa da jaǵdaı týǵyzylǵan", deıdi Darhan Nurpeıisov. Onyń aıtýynsha, QR Almaty qalasyndaǵy óńirlik qarjy ortalyǵy qyzmetin retteý agenttigi qor naryǵyna alǵash ret shyǵyp jatqan kezde halyqqa qarjylyq quraldarmen jumys jasaýǵa keńes bermeıdi. Alǵashqy kezde olar úlestik qorlardyń paılarymen jumys jasaýdy úırený kerek. Aktsııa men oblıgatsııalarmen ekinshi kezeńde ǵana jumys jasaýy tıis. Jalpy bıylǵy jyly qarjy naryǵyna 6 jańa emıtent shyqty. Olardyń jańa qarjylyq quraldary bar.
