Almatyda qarý-jaraq pen oq-dári saqtalǵan taǵy bir oryn tabyldy
Almaty qalalyq polıtsııa departamentiniń málimetinshe, ustalǵan kúdiktiler kinásin moıyndap, qarý-jaraq jasyrǵan jerdi kórsetti.
Bul joly jasyryn oryn ulttyq park aýmaǵynda, orman beldeýinde ornalasqan.
«Tapanshalar, patrondar, polıtsııa kıimderi salynǵan paketter jerdegi kárizge jasyrylǵan. Úsh tapansha, bir jaýyngerlik jáne 15 granata, Makarov tapanshasynan 100-den astam patron, Kalashnıkov avtomatynan – 107, ańshylyq myltyqtan – 16, eki oq ótpeıtin jılet, protıvogaz, radıostantsııa, polıtsııa formasy, kamýflıajdyq rıýkzak, sonymen qatar, 2,4 AQSh dollary kólemindegi qolma-qol aqsha tabyldy. Qarý-jaraq jappaı tártipsizdikter kezinde urlanǵan bolýy múmkin», – dedi Almaty qalasy boıynsha QAJD SI-18 jedel jumys jónindegi bastyqtyń orynbasary Azamat Amanjolov.
Atalǵan derek boıynsha Medeý aýdandyq polıtsııa basqarmasynda QR QK-niń 287-baby 2-bóligi boıynsha sotqa deıingi tergeý amaldary bastaldy.
