Almatyda qarý-jaraq qurastyryp, satyp kelgen 10 adam sottaldy

ALMATY. QazAqparat - Ulttyq qaýipsizdik komıteti áshkerelep, ustaǵan zańsyz qarý-jaraq satqan qylmyskerler sottaldy, dep habarlaıdy QazAqparat komıtettiń baspasóz qyzmetine silteme jasap.

Eske sala keteıik, ótken jyly maýsymda QR Ulttyq qaýipsizdik komıteti atys qarýyn jetkizýmen zańsyz aınalysqan halyqaralyq arnanyń jolyn kesken edi.

«Zańsyz aınalymnan 3 «Kalashnıkov» avtomaty, 3 granataatqysh, 2 jaýyngerlik granata, 14 tapansha, 1700-den astam patron men qarýdyń kerek-jaraǵy alyndy. Almaty qalasy men Almaty oblysynyń 10 turǵyny qylmystyq jaýapqa tartyldy. Sotqa deıingi tergeý barysynda ishki ister organdary qyzmetkeriniń qylmysqa qatysy bary anyqtaldy. Laýazymdy adam QR ІІM teńgeriminde turǵan oq-dárini urlap kelgen» dep habarlaıdy komıtetten.

Sonymen qatar, qarý qurastyrý boıynsha jasyryn sheberhananyń áreketi toqtatyldy.

Bıylǵy 27 qańtarda Almaty qalasy Almaly aýdandyq sotynyń úkimimen aıyptalýshylar ártúrli merzimge bas bostandyǵynan aıyryldy.