Almatyda qarý-jaraq dúkenin tonaǵan taǵy 2 adam ustaldy
Almaty qalalyq polıtsııa departamentiniń málimetinshe, ustalǵandar 27-28 jas aralyǵyndaǵy Almaty oblysynyń eki turǵyny bolyp shyqty.
Olardyń biri buryn bótenniń múlkin urlaǵany úshin sotty bolǵan.
«Bul joly kúdiktiler qarý-jaraq dúkeniniń múlkine kóz salǵan. 6 qańtarǵa qaraǵan túni olar «Kamerad» qarý-jaraq dúkenin tonap, odan 5 tegis uńǵyly myltyq, patrondar men oq ótpeıtin jıdelerdi urlaǵan. Kúdiktiler ustaldy jáne qamaýǵa alyndy», - deıdi Almaty qalalyq polıtsııa departamenti bastyǵynyń orynbasary Berik Ábilbekov.
Polıtsııa ókiliniń sózinshe, zattaı aıǵaqtar tárkilendi. Ustalǵandardyń basqa da, sonyń ishinde jappaı tártipsizdikter kezinde oryn alǵan qylmystarǵa qatystylyǵy tekserilýde.
Qylmystyq isti Áýezov aýdandyq PB janyndaǵy polıtsııa bólimi QR QK-niń 291-baby, 3-bóligi boıynsha tergep jatyr.
