Almatyda qarý men esirtki saqtaǵan 44 jastaǵy azamat ustaldy

ALMATY. QazAqparat – Almaty polıtseıleri Dostyq dańǵyly men Ospanov kóshesiniń qıylysynda arnaıy is-shara júrgizdi, dep habarlaıdy QazAqparat tilshisi.

Almaty qalalyq polıtsııa departamentiniń málimetinshe, ruqsat etilgen jeke tintý barysynda buryn múliktik qylmys úshin sottalǵan 44 jastaǵy A. esimdi azamattan ósimdik tektes zat salynǵan polıetılen túıinshek tárkilendi.

«Arnaıy is-shara qarý urlaý deregi boıynsha QR QK-niń 291-baby 3-bóligine sáıkes qozǵalǵan qylmystyq isti tergeý aıasynda júrgizildi. Keıin kúdiktiniń turǵylyqty jerinde ruqsat etilgen tintý kezinde saraıdan AK-74 avtomaty men TOZ-17 shaǵyn kalıbrli myltyǵy tabyldy. Bul qarýdyń naqty kimdiki ekendigi jáne shyǵý tegin arnaıy saraptama anyqtaıdy. Sonymen birge, A. esimdi azamatqa esirtki satqan 1970 jyly týǵan M. esimdi azamat ta ustaldy. Ol da tekserildi. Nátıjesinde ósimdik tektes zaty bar polıetılen baılamy jáne kúni, aty-jóni, qarjy somasy jazylǵan jazbalar tárkilendi», – dedi Almaty qalalyq polıtsııa departamenti bastyǵynyń orynbasary Dıdar Ahanov.
Sondaı-aq, qalalyq polıtsııa departamentinde QR QPK-niń 201-babyna sáıkes, ózge aqparattar jarııa etýge jatpaıtynyn habarlady.
«QR Konstıtýtsııasynyń 77-babynyń 3-tarmaǵynyń 1-tarmaqshasyna jáne QR QPK-niń 19-baby 1-bóligine sáıkes, zańdy kúshine engen sot úkimimen belgilengenge deıin árbir adam qylmystyq quqyq buzýshylyq jasaýda kinásiz dep tanylady», - dep habarlady polıtsııada.