Almatyda qarttar úıinde 2 adam koronavırýstan kóz jumdy: Dárigerler jaǵdaıdy túsindirdi
ALMATY. QazAqparat - Almatydaǵy qarttar úıinde eki er adam koronavırýs juqtyryp kóz jumdy. Taǵy bir áıel juqpaly aýrýlar statsıonarynda jatyr. Qalalyq densaýlyq saqtaý basqarmasy bul jaǵdaıǵa qatysty túsinikteme berdi, dep habarlaıdy QazAqparat tilshisi.
Basqarma taratqan málimetke sáıkes, vırýstan kóz jumǵandar «Shańyraq» áleýmettik qyzmetter ortalyǵynda turady. Sonymen qatar, olar jasy boıynsha «ardagerler» sanatyna jatpaıdy.
«1945 jyly týǵan Azamat Hamıtov 16 sáýirde « Shańyraq «áleýmettik ortalyǵynan I. S. Jekenov atyndaǵy qalalyq klınıkalyq juqpaly aýrýlar aýrýhanasyna óte aýyr jaǵdaıda tústi. Al 1953 jyly týǵan ekinshi azamat 15 sáýir kúni Ortalyq qalalyq klınıkalyq aýrýhanaǵa týystarynyń úıinen aýyr jaǵdaıda jetkizildi. «Shańyraq» ortalyǵynyń úshinshi turǵyny 1947 jyly týǵan J. esimdi azamatsha Ortalyq qalalyq klınıkalyq aýrýhanada em qabyldap jatyr. Onyń jaǵdaıy ortasha aýyrlyqta «, - dep habarlady basqarmadan.
Óz kezeginde №7 qalalyq klınıkalyq aýrýhananyń ákimshiligi marqumdardyń biri osy medıtsınalyq mekemede koronavırýs juqtyrdy degen aqparatty joq shyǵardy.
« 1953 jyly týǵan naýqas A., Almaty qalasy №7 qalalyq klınıkalyq aýrýhanasynyń №1 ınsýlt bólimine 2021 jyldyń 26 naýryzy men 5 sáýiri aralyǵynda jatty. №7 aýrýhanada emdelý kezeńinde naýqasta koronavırýs ınfektsııasynyń belgileri bolǵan joq. KVI-ge tapsyrǵan PTR analızi teris boldy. Bólim jaǵdaıynda qajetti medıtsınalyq kómektiń tolyq kólemi QR Densaýlyq saqtaý mınıstrliginiń hattamalary boıynsha júzege asyryldy. Densaýlyǵynyń jaqsarýyna baılanysty aýrýhanadan shyǵaryldy. Keıbir adamdardyń patsıenttiń «aýrýhanada koronavırýs juqtyrdy» degen málimdemesi negizsiz dep sanaımyz «, - dep atap ótti №7 qalalyq klınıkalyq aýrýhana ákimshiligi.
