Almatyda qarttar men balalarǵa úıde profılaktıkalyq medıtsınalyq tekserý júrgizý bastaldy
ALMATY. QazAqparat – Almaty qalasynyń ákimi Baqytjan Saǵyntaevtyń tapsyrmasy boıynsha qarashanyń 2-sinen bastap Almatyda qarttar men balalarǵa úıde profılaktıkalyq medıtsınalyq tekserý júrgizý bastaldy, dep habarlaıdy QazAqparat tilshisi.
Almaty qalasy Densaýlyq saqtaý basqarmasy basshysynyń mindetin atqarýshy Janar Madeeva atap ótkendeı, tótenshe jaǵdaı rejımi men karantın kezinde profılaktıkalyq tekserýler júrgizilmegendikten, COVID-19 ekinshi tolqynyna daıyndyq aıasynda halyqtyń eń osal toptaryna profılaktıkalyq tekserýler uıymdastyrý týraly sheshim qabyldandy. Birinshiden, bul egde jandar (65 jastan asqan), olardyń arasynda arterıaldy gıpertenzııa, sozylmaly obstrýktıvti bronhıt, qant dıabeti jáne osy sııaqty sozylmaly aýrýlary bar naýqastar kóp.
«Árbir alǵashqy medıtsınalyq-sanıtarlyq kómek kórsetý uıymynda jalpy tájirıbe dárigeri, nevropatolog, kardıolog, otolarıngologtan turatyn mýltıdıstsıplınarlyq komandalar quryldy, olar qarttardy úıde qarap, qant, holesterın deńgeıin anyqtaıdy, EKG jasaıdy. Bul emdeýdi túzetýge nemese statsıonarlyq emdeý úshin kórsetkishterdi anyqtaýǵa múmkindik beredi. Sonymen qatar, jasy úlken toptaǵy 80 myńǵa jýyq adamdy qamtý josparlanýda», — dep atap ótti Janar Madeeva.
Budan basqa, balalardyń uzaq ýaqyt boıy qashyqtan oqyp jatqandyǵyn jáne emhanalarǵa is júzinde barmaıtyndyǵyn eskere otyryp, Almaty ákimdigi 16 jasua deıingi balalardy profılaktıkalyq tekserýden ótkizý týraly sheshim qabyldady. Balalardy profılaktıkalyq tekserý úshin pedıatr, nevropatolog, okýlıst, otolarıngolog, balalar hırýrgi dárigerlerinen quralǵan mýltıdıstsıplınarlyq komanda bar. Qajet bolǵan jaǵdaıda taldaý úıde júrgiziledi. Shamamen 100 myńǵa jýyq balany qamtý josparlanýda. Áleýmettik qorǵalatyn otbasylardaǵy balalarǵa, múmkindigi shekteýli balalarǵa basa nazar aýdarylady.
Almaty qalasynyń óńirlik kommýnıkatsııalar qyzmetiniń alańynda ótken onlaın-suhbat barysynda №8 qalalyq emhananyń bas dárigeri Farıda Aǵybaeva nysanaly toptardyń tizimi qalyptastyrylǵanyn, profılaktıkalyq tekserý júrgizý kestesi bekitilgenin, pedıatr, nevropatolog, otolarıngolog, kardıolog, oftalmolog, balalar hırýrginen quralǵan mýltıdıstsıplınarlyq komanda bekitilgenin málim etti.
«Emhanada patronajdyq qyzmet kórsetýdiń ámbebap progressıvti modeline sáıkes patronajdyq medbıkeniń erte jastaǵy balalarǵa, onyń ishinde bosanǵanǵa deıingi kezeńge úıde tekserý júıesi engizildi. Patsıenttiń otbasymen onyń jeke ortasynda kezdesý mamanǵa problemalardy túsinýge jáne durys sheshim qabyldaýǵa erekshe múmkindik beredi», — dedi bas dáriger.
