Almatyda qart adamdarǵa qalaı qamqorlyq jasalady
ALMATY. QazAqparat- Almaty qalasy Áleýmettik ál-aýqat basqarmasy basshysynyń orynbasary mindetin atqarýshy Jánibek Qarataev Óńirlik kommýnıkatsııalar qyzmeti alańynda ótken brıfıngide megapolıste qart adamdarǵa qalaı qamqorlyq kórsetip jatqanyn aıtyp berdi, dep habarlaıdy QazAqparat tilshisi.
Onyń aıtýynsha, qart adamdar — keıingi urpaq úshin baǵdar.
«1 qazan - Halyqaralyq qarttar kúni. Bul kún bizge aǵa býynnyń taǵdyry týraly oılanýǵa, el men qalamyzdyń damýyna úlken úles qosqan adamdarǵa óz rızashylyǵymyz ben súıispenshiligimizdi bildirýge múmkindik beredi. Qarttar kúni – bul egde jas kelerin eske salý emes, jas urpaqty tárbıelegeni, qajyrly eńbegi úshin ortaq alǵys bildirý kúni», - dedi ol.
Áleýmettik ál-aýqat basqarmasy basshysynyń orynbasary Almaty ákimdigi egde jastaǵy azamattarǵa tolyqqandy ómir saltyn júrgizýge múmkindik beretin jaǵdaılar jasaý boıynsha birqatar shara qabyldap jatqanyn jetkizdi.
Qazir Almatyda shamamen 231 myń zeınetker bar. Jyl saıyn qalalyq bıýdjetten materıaldyq jáne áleýmettik qoldaý kórsetýge qomaqty qarajat bólinedi.
Jánibek Qarataev qalada muqtaj otbasylarǵa áleýmettik tólemderdiń 17 túri kórsetiletinin atap ótti.
Zeınetkerlerge, onyń ishinde Uly Otan soǵysynyń ardagerlerine, tyl eńbekkerlerine Jeńis kúnine oraı tólemder júzege asyrylady jáne kommýnaldyq qyzmetter úshin shyǵyndar óteledi. Budan basqa, sýdy, gazdy esepke alý aspaptaryn jáne gaz jabdyǵyn ornatý tegin.
Jasy boıynsha zeınetkerlerge bazalyq zeınetaqyny eseptemegende 25% tólemmen sanatorlyq-kýrorttyq emdeý qyzmeti usynylady.
«Áleýmettik tólemder ótinish negizinde jáne belgili bir ólshemderdi eskere otyryp kórsetiledi. Mysaly, Jeńis kúnine oraı 16 800 ardagerge 1,2 mlrd teńge somasynda materıaldyq kómek kórsetildi, 150 myńǵa jýyq zeınetkerdiń kommýnaldyq shyǵystaryna tólemder bólindi, 1 600-den astam qala turǵyndaryna turǵyn úı kómegi kórsetildi», - dedi spıker.
Basqarma ókili jeke bastamasy boıynsha egde jastaǵy adamdarǵa kómektesetin almatylyqtarǵa, metsenattarǵa alǵysyn bildirdi.
Ol Almatynyń qart turǵyndary kóńil aýdarýdy, qarapaıym adamdardyń qatysýyn qajet etetinin, al jergilikti atqarýshy organdar tarapynan qoldaý jan-jaqty kórsetiletinin tilge tıek etti.
