Almatyda «Qarlyǵash» - kámeletke tolmaǵan jasóspirimder arasyndaǵy temeki shegýge qarsy» jobasy iske asýda
ALMATY. Qyrkúıektiń 2-si. QazAqparat /Ádilet Musahaev/ - Almatyda Qazaqstannyń isker áıelder qaýymdastyǵynyń bastamasymen «Qarlyǵash» - kámeletke tolmaǵan jasóspirimder arasyndaǵy temeki shegýge qarsy» jobasy iske asyrylýda. Bul jaıynda búgin arnaıy ótken baspasóz máslıhatynda aıtyldy,
dep habarlaıdy QazAqparat.
Qazaqstannyń isker áıelder qaýymdastyǵy bes jyl boıy atalmysh jobany iske asyrýmen aınalysyp keledi. Joba Astana, Aqtaý, Oral, Pavlodar, Shymkent jáne Almaty oblysynyń Іle aýdanynda iske assa, 1-shi tamyzdan bastap Almaty qalasynda júzege asýda.
«Jobanyń maqsaty - bólshek saýda qyzmetkerlerin aqparattandyrý arqyly kámeletke tolmaǵan jasóspirimderge temeki satýǵa tosqaýyl qoıý, jasy on segizge tolmaǵandarǵa temeki satýǵa tyıym salý, sonymen qatar jobanyń ıdeıasyn qoldaıtyn áıelder arasynan erikti toptar qurý bolyp tabylady», deıdi Qazaqstannyń isker áıelder qaýymdastyǵynyń basshysy Raýshan Sársembaeva.
R. Sársembaevanyń aıtýynsha, eriktiler kámeletke tolmaǵandarǵa temeki ónimderin satýǵa tyıym salynǵandyǵy týraly bólshek saýda ókilderin aqparattandyrady. «Ótken aıda joba qyzmetkerlerimen eleýli ister atqaryldy. Búgingi kúni Almaty qalasy boıynsha bul sharamen 150 saýda núkteleri jáne 10 iri toraptyq gıpermarketter, sonymen qatar 170 kólik baǵyttary qamtyldy», deıdi qaýymdastyq basshysy.
Joba aıasynda shaǵyn dúkender men iri sýpermarketterdiń satýshylary men menedjerleri «temeki ónimderin kámeletke tolmaǵan tulǵaǵa satýdan qalaı durys bas tartýǵa bolady» taqyrybynda oqýlar ótkizgen. Sondaı-aq 2010 jyldyń 27-shi tamyzynda Almaty qalasynyń Bostandyq aýdanynda qalanyń ІІD-ti ınspektorlarynyń qatysýymen jáne «Habar» telearnasynyń aqparattyq qoldaýymen reıd ótkizgen.
