Almatyda «Qarly Alan» parki ashyldy

Muz ben qardan jasalynǵan parkte ár túrli jasqa arnalǵan muzdy syrǵanaqtarmen qatar, muzdan jasalynǵan labırıntter, pıramıdalar, qarmen atysyp oınaıtyn daýaldar, slalom joldar, balalardyń oıyndaryna arnalǵan alańdar bar. Park ár jyldary Azııa oıyndarynyń sımvoldary-boıtumarlary bolyp tabylatyn beınelermen ásemdelgen. Muz qalashyǵynyń dál ortasynda elimizdegi Azııa oıyndarynyń boıtumary bolyp tabylatyn «Alan» beınesi turǵyzylǵan. Parktiń jalpy kólemi 70 sharshy metr.

Atalmysh parkti jasaýshy «Sky Eagle» týrfırmasynyń dırektory Ásel Álisherovanyń aıtýynsha, parkti jasaýda biraz qıyndyqtar bolǵan. «Bıyl qar az túskendikten qardy taý etekterinen jınaýǵa týra keldi. Bul parkti jeltoqsan aıynyń aıaǵynan bastap jasaı bastadyq. Qalashyqty turǵyzýǵa 12 adam tartyldy, onyń ishinde qurylysshylarmen qatar, sýretshiler de bar. Biz bar ónerimizdi salyp jasadyq. Ár Azııa oıyndarynyń boıtumarlaryn jasaýǵa bir aptadan asa ýaqyt ketti. Muzdy qalashyq erigenshe, parkke qalanyń mektep oqýshylary men balalar úılerinde tárbıelenýshi jetkinshekter arnaıy shaqyrylatyn bolady»,-dedi ol. Onyń aıtýynsha, park saǵat 10.00-den 17.00-ge deıin jumys isteıtin bolady.

Parkte sonymen qatar Qazaq aýyly boı kótergen. «Aq otaýdyń» kommertsııalyq dırektory Lázzat Luqpannyń aıtýynsha, etnoaýyldy turǵyzýdaǵy basty maqsat Azıada qonaqtaryna ata babalarymyzdyń salt dástúrin, ulttyq taǵamdardy tanystyrý bolyp tabylady.