Almatyda qarqyndy damýdyń nysanaly modeli jasaldy
ALMATY. QazAqparat - Almaty qalalyq kásipkerler palatasy Almaty qalasynyń qarqyndy ekonomıkalyq damýyna arnalǵan jańa nysanaly model daıyndady. Bul týraly palatanyń baspasóz qyzmeti málimdedi, dep habarlaıdy QazAqparat tilshisi.
Jańa qujat 5 negizgi baǵytty óndiristik qýattardy, ımportty almastyrýdy damytý, qyzmet kórsetý salasynyń áleýetin damytý, bir-birine baılanysty salalar kartasyn jasaý, ınfraqurylymdyq bastamalardy iske asyrý, týrıstik áleýetti damytýdy kózdeıdi.
«Saraptamalar kórsetkendeı, Almaty qalasynda shaǵyn jáne orta bıznesti damytýdyń bolashaǵy - azyq-túlik jáne jeńil ónerkásip. Palata osy baǵytta birneshe kezeńnen turatyn jumys jasaýdy josparlap otyr. Aldymen, ımportty almastyrý úshin el múmkindigin anyqtaý, onyń ishinde álemdik tájirıbe boıynsha zertteý júrgiziledi. Áleýetti, kólemdi, taratý arnalaryn, tehnıkalyq jabdyqtardy kórsetetin óndiris kartasy jasalady. Odan keıin azyq-túlik jáne jeńil ónerkásip salalarynda jetkizý tizbegin anyqtaý júrgiziledi. Pılottyq rejımde 10 jobaǵa qoldaý kórsetiledi», - dedi Almaty kásipkerler palatasynyń dırektory Baǵdat Telebaı.
Onyń aıtýynsha, qyzmet kórsetý salasynda taldaý júrgizilip, 10 joba iske asady.
«Almaty qalasynyń turǵyndary men kásipkerleri úshin bıznes-ınfraqurylymnyń qajettilikterin taldaý kerek. Taldaý qorytyndysy boıynsha, qazirgi tańda, Alataý men Naýryzbaı aýdandarynda 17 myń balaǵa mektep jetpeı tur. Palata osy áleýmettik nysandardy salý boıynsha usynystar ázirleıdi», - dedi Almaty qalasy kásipkerler palatasynyń dırektory.
Infraqurylymdy damytý úshin kóshe saýdasy damýynyń tujyrymdamasy sheńberinde statsıonarlyq emes saýda nysandarynyń kartasyn engizý, «Ýmnyı magazın ý doma» jobasyn jasaý, ónerkásip keńsesiniń bazasyn qurý josparlanǵan.
Týrıstik áleýetti damytý úshin etno meımanhanalarǵa (kıiz úılerge), jazǵy shatyrly úıleri, qonaq úılerge, kempıngterge jáne karavanıngige arnalǵan bıznes jol paraǵy jasalady. Bul paraqshalarda bıznesti ashý, damytý jáne bıznes týraly tolyq málimetter jazylady.
«Almaty qalasynyń Kásipkerler palatasy býhgalterlik jáne salyq qyzmetterin tikeleı bazardyń qyzmettegi núktelerinde qamtamasyz etýdi josparlap otyr. Olar kásipkerlerge arnalǵan mını-servıstik ortalyq dep atalady, búgin olar «Mızam» jáne «Salem» bazarlarynda ornalasqan. Sondaı-aq ákimdikpen kelissózder júrgizilýde, onda palata ókili shalǵaıdaǵy aýdandardyń bıznes-bólimshelerinde bolady», - dedi bıznesti servıstik qoldaý dırektordyń orynbasary Aspena Dosmaǵanova.
Budan basqa Almaty kásipkerler Palatasynyń 2018 jylǵy jumysyna qortyndy jasaldy.
Baǵdat Telebaı aıtqandaı, 2018 jyly Almatynyń JAÓ 2,6% ósti (QR JІÓ-nen 18,9%), negizgi kapıtalǵa salynǵan ınvestıtsııalar 21,6% -ǵa, onyń ishinde shıkizattyq emes sektorda 24,4%-ǵa ósti.
ShOB-tiń JAÓ-gi úlesi 41,6%, ShOB 5,3%-ǵa kóbeıdi, óndirilgen ónimniń kólemi 12,1% ósti.
«Ótken jyly Almaty qalasy kásipkerler Palatasyna 167 shaǵym túsip, onyń 88-i oń sheshimin tapty (52,7%). Palata kásipkerler quqyǵyn qorǵap, 1,2 mlrd teńge shyǵynnan saqtady», - dedi kásipkerler palatasy dırektorynyń quqyqtyq máseleler jónindegi orynbasary Aıtýar Qoshmambetov.
Kásipkerlerge byltyr 6711 qyzmet oflaın rejimde, 3456 qyzmet onlaın rejimde kórsetilgen.
Bıznes mektep aıasynda 2 737 kásipker oqytyldy.
«Kásiporyndardyń ótinishteri boıynsha 2018-2019 oqý jyldaryna jol kartasynyń dýaldy bilim berý júıesi quryldy, onyń ishinde 28 kolledj ben 101 kásiporyn bar. Tizimde 1191 dýaldyq oqytý sharttary kórsetilgen. Ol ótken jylmen salystyrǵanda 65%-ǵa joǵary», - dedi Baǵdat Telebaı.
Týrıstik áleýetti damytý maqsatynda «Týrızmdi damytýdyń 100 qadamy» baǵdarlamasy jáne jospary bekitildi.
Osy josparǵa sáıkes, búgin Almatyda týrıstik operatorlar, jyljymaıtyn múlik agenttikteri, qolóner ortalyǵy, týrısterge arnalǵan demalys oryndary ornalasqan týrıstik hab quryldy. Týrıstik avtobýstarǵa arnalǵan arnaıy aıaldamalar uıymdastyryldy, qalanyń murajaılarynda 4 tildi aýdıogıd iske qosyldy.
Budan basqa, Almaty damý kartasyn jasady. Makroekonomıkalyq kórsetkishterge saraptama júrgizildi. 7 sala boıynsha qalanyń 232 kásipornyna pasportızatsııa júrgizildi.
