Almatyda káriz qudyǵynyń lıýgi kólikti zaqymdady

ALMATY. QazAqparat – Almatyda jol jıegindegi káriz qudyǵynyń qaqpaǵy qysymmen aspanǵa atylyp, qala turǵynynyń kóligin zaqymdady. Endi ol shyǵyndy kimnen ótep alaryn bilmeı dal, dep habarlaıdy QazAqparat tilshisi.

Káriz qaqpaǵynyń aspanǵa atylyp, jeńil avtokólikti zaqymdaǵan vıdeosy áleýmettik jelide tarady.

«Káriz qaqpaǵy kóligimdi qıratty. Ótip bara jatqan adamdardyń sózinshe, káriz qaqpaqtary joldyń qarsy betinde jáne Saın-Rysqulov kósheleriniń qıylysynda da aspanǵa ushqan (munda da kólik búlingen). Shamasy káriz júıesinde gaz atylǵan bolsa kerek. Endi kóligimniń shyǵynyn kim óteıtinin bilmeımin», - dep jazdy kólik ıesi jelide.

Osyǵan baılanysty «Almaty Sý» memlekettik kommýnaldyq kásiporny QazAqparat tilshisiniń saýalyna jaýap berdi. Kompanııanyń málimetinshe, zaqymdalǵan kólikti «Almaty Sý» MKK qalpyna keltiretin bolady.

«10 mamyrda Saın dańǵylyndaǵy avtoturaqta turǵan avtokólik sý burý júıesinde ornatylǵan jabyq káriz qudyǵynan aspanǵa ushqan lıýktiń saldarynan zaqymdandy. Oqıǵa saldarynan qaza tapqandar men zardap shekkender joq. Bolǵan jaǵdaıdyń sebebin anyqtaý úshin arnaıy ishki komıssııa quryldy. Zaqymdalǵan avtokólik QR zańnamasynda belgilengen tártippen «Almaty Sý» MKK kómegimen qalpyna keltiriledi», - dep habarlady kompanııadan.